j' sins que ch est ché derniers temps
par minloute le, 01/01/2015cha fait un momint qu in m a ram'né al' mason, chéto fin novempe, là j éto l' roi, j avo drot à toutes ché attentions
in m a fait del plache pour que j' rinte par l' porte, sans que mes branques al' so abimées, quand que j' su rintré, j a vu tout d' suite que j éto attindu
à peine installé, vla ti pas qui y a eune ribambelle d' infants qui s'sont carrèmint jetés sur mi pour m' faire cor plus bio
des boules par chi, des guirlantes par là, eune étoile tout in haut sur m' derniere branque , des tchiots personnaches qu in accrocho avec soin sur mes cotés... sans parler des guirlantes lumineusses pour m' faire cor plus attrayant ...
combien d' coups après , jusqu à la noel, ché zinfants sont passés d' vant mi, les ziux emerveillés ........
im' ravisotent du ginre, " ah que j' voudro djà et' à la noel pour vire ché cadeaux apportés par ch' père noel"
et que dire du 24 au soir quand qui zont mis leurs chaussures à min pied ......
mi j'dis rin, j' leur dis pas, que ch'père noel y existe te pas , nan mi jel sais, ché ché adultes qui dépossent ché cadeaux à min pied
jel sais j' l a vu faire dans la nuit du 24 au 25 ..... mais j' va pas leur gagner leu plaiji
ah j a été contint d' les vire ouvrer ché cadeaux, s emerveiller , pousser des tchiots cris d' joie.........
et pourtant savez , ché zinfants i sont ingrats, pasque eune fo d'vant ché cadeaux, bin mi j existe pu
rapid'mint in débarrasse tout c'qui a à min pied, cadeaux et surtout emballaches , et in comminche dès ch' t instant là à pu vraimint m' raviser
oh ch'est vrai j' fais cor partie du décor, mais in m' vo d'moins en moins
mi j' comminche à tranner, quand que queques jurs après noel, j intinds " i comminche à perte grinmint ché zépines chtilale"
ouh cha sint la fin cha , pi pour mi pas d' espoir, min pied, bin y est coupé, ch'est pas des racines, j' peux meme pas rever d' finir planté dinch' gardin.....
ché zinfants ? i m ignorent asteure, j a pu la cote, j a intindu que che sam'di , l' patronne ale allo artirer l' décoration et que j allo finir such' trottoir
j' m in douto savez, mais c'qui m a fait l' plus d' maux, ch'est que là ché zinfants i s'sont pas bousculés pour s occuper d' mi, meme leu mère ale le dit " ah ch'est sur que pour l' mette in plache y a du monte , mais pour artirer ché décorations y a pas personne" ...
j el sais tout cha, j a pu qu eune paire de jurs à profiter , j' verrai pas arriver ché rois mages , mais j' me fais eune raison, et pi sans mi, commint voulez vous imaginer un noel sans sapin ...
l année prochaine che s'ra un aute, mais j' su contint, pasque d habitute , et cha fait un momint qu ichi in metto chaque année in plache un faux sapin, là i zont décidé d'canger , d arvenir à un sapin traditionnel "cha sint bon " qui dijotent "cha m' rappelle m' n infance" qui dijotent ......
j' espère qu au moins l année prochaine i donneront cor leu chance à un vrai sapin comme mi ...