passache en CE2

bon cha y est, j a rintré en CE2 à Loubet
toudis l'"meme plaiji" quand qu in est au coin d'la rue Anatole France , qu in va dévaler vers la rue d' Anzin, tourner rue de Denain et arriver à l école Loubet

plus en s in approcho, plus qu y avo d' manmans avec leu zinfants su ché trottoirs ou l'bord del route, ouais pasque chéto eune époque du qui yavo bin moins d infants qui étotent conduits in carette .....

l' intrée en CE2, chéto djà un peu moins, j ' va imployer un mot moderne "stressant"

d' abord in avo djà fait eune premiere année, pi in savo avec qui in allo querre comme mait'

pi surtout in allo pu et' ché plus pitits , d' ailleurs in arrivant d'vant ch'grand portal in ferale vert, in raviso d' coin avec un air amusé, ché tchiots qui allotent rintrer en CE1
in les raviso de haut, vu que nouzautes, in éto BEAUCOUP plus viux qu eux, presque des vieux d' vielle, vu qu in éto EUNE CLASSE PLUS VIEUX QU EUX...des années lumières quoi....

nouzautes in n' avo aucun doute d' savoir avec qui in allo et' , ch'éto mr Robitaillé, pi in savo que toute l' classe d' CE1 d' Mr Wacheux ale passo ensempe avec li

en cangeant d' classe in cangeo de statut, fini l' tchiote salle d' classe camuchée sul' coté , on intégro l' batimint d' gauche, et in plus on passo d un rez de chaussée à l étache
en grimpant ch' grand escayer en bois , aux marches usées par tant d' passaches d infants, depuis l' début des années 1900....

in connaicho déjà les rites, les interdits, pas courir souch' préau, pas juer avec l io, pas juer dins ché cabinets, pas s' batte avec ché tiches d'marronnier qui quéyotent au sol , pas verser des feules sul'tiete d un aut'garchon, pas confonde un cartape avec un ballon d'foot

pi aussi bin acouter ch' sifflet d' ché maites, s 'arreter sur plache quand que ch' directeur i sifflo la fin d' la récré, attinte qui arsiffle un coup pour qu in artourne SANS COURIR d'vant not'batimint du que not' maite i nous attindo
bin s' mette en rang, printe ses distances BRAS TENDUS FIXE! REVENEZ FIXE ! et qu in pouvo monter dins l'classe tout en restant en rang ET EN SILENCE, ET SANS CLAQUER ché pieds dins ché zescayers, rintrer parel duch'mint en classe et s assire sans faire d' bruits eune fo ché mantiaux bin accrochés à ché patères

eune fos que zaviez compris cha, pi qui fallo éviter d aller s' frotter avec ché CM2 et pi l' classe qui préparo l' Certificat d 'Etutes, normal'mint, i devo rin vous arriver d' extraordinaire durant l' année .....

à la rintrée on éto contint des' revire, pi aussi in savo qu in in avo pour eune année d' leçons, d' devoirs, d interrogations, d récitations etc etc

grante question, commint qu on allo s artrouver en classe, ch' maite i nous laisso nous installer, pi après yavo un grand silence, et i désigno queques zélèffes les uns après les zautes pour leur faire canger d' place , et les permuter

à croire qui avo un troisieme eule, tout d'suite i devino qui fouto ch'brin et avec qui, i savo ramener ché brebis galeusses qui s'étotent plachées tout d'suite dins ch'fond, pour les ramener vers l' devant d' l estrate, juste in face d' sin bureau

mi j' pinso qui avo des pouvoirs d'voyance, i strompo jamais, m a fallu quequ'zannées pour comprinte que ch' maite d' l année d avant i li avo signalé , les "cas litigieux"...........