appréhension fin d' cm2
par minloute le, 05/02/2015cha y est in arriffe à la fin du CM2, fini not' parcours à Loubet
in y éto rintré , et ch'est l'cas del dire, par la ptite porte, chéto en 1964, école des filles
djà que j' me souveno et'passé , en "approche" devant chte porte, am'mote en avril mai 1963 et que m'mère ale m avo dit j' m in souviens, "bin à la rintrée té va aller ichi, té verras ché bin l école"
mi j a du faire min sourire commercial, ou plutot eune mimique, eune grimace pour dire ouais avec un tchiot sourire dessiné , am'mote j' avo d'viné que ch'éto pas si rose qu' cha à l intérieur ...
mais tout cha ch'est un temps révolu, j a fait mes 2 années d' maternelle chez ché files, l'reste jusqu à ch' t année à l école des garchons
autant j y éto arrivé tout penaud, tout contint quand meme d y artrouver min copain Asselin qui habito rue de Chatellerault, et que j avo débuté, j' l a raconté y a pas longtimps avec mr Wacheux
asteure nouzautes, in éto en CM2 ché grands, bon bin sur juste après ceux qui étotent pour l' certificat d étutes, mais j a l' vague souvenir, que j me d'minte si zétotent en récréation in meme temps qu'nous
cha a du et' l'cas, mais j a pas souvenir qu in avo été "imbété" par eusses
CM2, in raviso ché éleffes des cours élémentaires , avec l' meme dédain, qui zavotent eu eux, à not' plache quand qui sont arrivés en cm2
j artrouverai d ailleurs ch' meme sentimint en faijant l armée, si t éto "bleu bite" ou "libérape" ......
in éto ché plus anciens, avec les éleffes d' l aute cm2 chti qui éto dirigé par ch' directeur, que j' cite pas sin nom, tel'mint i le mérite pas
j i arpinso y a pas longtimps vu tout c'qui a fait , i pourro pu l'faire asteure, sinan i auro eu d' graffes ennuis juridiques, mais in in arparlera un coup, ptete pas d ailleurs, à armuer ch' brin, enfin in verra ...
donc nous ché "anciens" , in "survolo" la récréation, quequ'fos cha nous arrivo d imbeter ché plus jones, gentimint quand meme, pasque meme si ché maites i nous connaissotent bin ,in éto passé par leu bancs, i veillotent à c'qu in chahute te pas trop avec eux
cha ch éto la spécialité de mr Robitaillé, meme quand que ché profs i discutotent in rond ensempe , ou quequ'fos à plusieurs i traversotent d' long in larche la cour, mr Robitaillé i avo l' eule , la vo, et l' sifflet vifs .....
et té pouvo artourner at' plache dins t' classe avec eune punition que t avo donné ch' maite qui s occupo des ce2
la honte .....
in régno, in éto plus turbulent, j' me souviens qu in faijo des travaux manuels, et avec l' pate à papier qu in faijo , in n a qui invoyotent cha au plafond et cha collo ......
in éto ché plus viux, mais in intindo d' plus in plus souvint ou plutot in voulo pas trop intinte c'que certains i dijotent sur ce que ch'éto l' college
alors chéto toudis des zéleffes qui avotent so un frère ou eune soeur qui y éto ach' momint là et i nous racontotent c'qu eux voulotent bin leur raconter, in plus cha devo et' déformé, in tout cas cha nous rassuro pas
ouais alors té verra , t aura pu 1 maite, t auras plein d' profs, té va devoir toudis canger d' classes, té verro ché devoirs, min frère i a du faire eune rédaction fallo qu ale fasse minimum quat' paches
pi té verro ché interrogations, ché profs i l'dissent te pas à l avinche, ch'est du ginre clac, prenez eune feule et interrogation surprisse
à les écouter, leu frères i croulotent sous ché liffes, que chéto tout juste si i zacatotent pas eune carette à tchien pour pouvoir immener au collèche l ensempe des liffes pour el' journée
que leu frères i s' plaignotent que ch'éto dur d apprinte l anglais, qui faijotent des expériences d' chimie, qui zutilizotent des cahiers à tchiots carreaux, pi des cahiers qu in utiliso pas nouzautes in primaire
des cahiers à musique avec des droles d' lignes d'dins, des grands , des pitits cahiers à spirale, des cahiers avec eune pache blanque et eune pache à carreaux
parait aussi qui zutilissent des compas bin plus compliqués que chti qu in avo à l école, qui fallo in acate des espéciaux, que meme i n avo un i avo ramené en cours l' compas d' sin frère
certains étotent épatés, mi effrayé, vu que mi et la géométrie cha faijo quinze......
à les acouter, i zavotent des monceaux d'traval à faire à la mason, que ché profs i portotent pas d' blousses, et que pour faire ché courses escolaires y avo eune liste d' fournitures à acater ...
pas rassurant tout cha, sauf qui dijotent qu au collège ché garnoules étotent mélingées avec nous dins ché classes
j éto en cm2 et à ch' t époque là , chéto pas pour m' rassurer, ché garnoules in les voyo pas à l école , in les zintindo juste derriere ch'mur qui séparo l école des garchons et d l école des files
i racontotent que leu frère i avo fait des "conquetes", ouais mi j' em voyo pas faire cha, j éto pas à l aise, bon après j' m a rattrapé j' vous rassure, mais voyez à intinte tout cha , j' éto pas rassuré
pi mi, mes soeurs ale zétotent pu en collège, et meme au lycée, ale zavotent terminé leu scolarité ....
pour vous dire que l' derniere journée, à ché récréations du qu in peut , du qu in canto ouais , "gai gai l écolier"
savez "gai gai l écolier , c'est demain les vacances, gai gai l écolier, c'est demain nous partirons ...
nous partirons à lyon , manger des cornichons .
...
des cornichons pourris, mangés par les souris ...
gai gai l écolier..."
in canto cha tous en ligne, classe par classe , bras d' sus bras d'sous, et in tourno dins l'cour en cantant cha à tue tete
avec ché instituteux au miyeu qui nous ravisotent en souriant ...
bin j' do vous avouer que j' canto cha, un peu comme "ce n 'est qu un au revoir ", yauro pas fallu grand cosse d' plus pour que j a pas eune larme au coin d' leule ...