le match qui fallo pas perde

ch'éto le match qui fallo pas perde, à domicile et contre évian thonon gaillard, compagnon d infortune comme nouzautes in bas du classemint

y a cor queques semaines in éto eune floppée dins les memes points, in éto "à l abri" , in pouvo s' dire "bin in est pas les seuls et de loin" "y a que 4 points qui nous séparent du treizième" ...

pi tout douch'mint, autour d' nous, i n a certains qui ont comminché à armonter, certains qui zétotent pas à leu plache , in a pu dire ensuite "chéto eune mauvaise passe" , pi y a bin fallu raviser autour d' nous in éto pu si nombreux à trainer en fin d' tableau

pire, le stade de caen , qui avo toutes les raisons d' plonger tout in bas du clas'mint avec les zhistoires de matchs truqués, de président mis en examen, bin li y est parti comme i dissent dans eune "spirale positive" ....

bon vous m' direz, et ch'est vrai, à forche d'es' bercer ou des' faire bercer par gervais martel , in a cru , in a ptete voulu croire meme si ch'éto avec d' plus en plus d'réticence sin discours volontair'mint soporifique

"zinquietez pas ,l' argent i va arriver" "j ' m in va l' querre là bo", "in va l avoir dans les 15 jurs" "j'su pas inquiet" "le gouvernement d azerbaidjan i va nous aider" "in a archu eune partie le reste dans les prochains jurs" etc etc etc etc

bilan d' l histoire, j' cro que tout l' monte , aujourd hui, in pourro arprinte le titre d un liffe ch'est " chronique d une mort annoncée"

j' pinse que l' entraineu y a fait c' qui a pu , in est parti de bin loin en début d' saison, in a eu du miu, mais bon , avec eune équipe qui a franch'mint pas le niveau faut l' dire, meme si i mouillent l' maillot , y a un momint du que té t artrouffe quand meme au pied du mur

un entraineu cha donne un souffle à eune équipe, cha motive, mais j' pinse aussi que imperceptiblemint i li cro moins et j'el comprinds cha do pas et' eune saison de tout repos loin de là

ché jueux aussi , i doivent et' aussi "un peu" désabusés, in leur a promis des renforts, et au lieu d' cha i n' a qui sont partis...

alors quand qu in ravisse l' classement en date du 15 février au matin, bin in est avant dernier et cor metz y a pas cor jué, mais là l écart avec chti qui nous précéde, évian thonon , y est déjà de 4 points , comme si chéto eune premiere cassure dans l' class'mint

as'deminder si à partir d' la semaine prochaine, la question cha risque pas d 'ete , "qui qui va accompagner le rc lens et metz en ligue 2"

à moins bien sur, d un sursaut, ou que les dieux du football, d'vant eune équipe impétrée dans un tel brin , d' la faute d un coup d' poker d'sin dirigeant y a queques mos à aller s abibocher avec des gins qui sont au fin fond d'la russie, i décitent d' leur donner la potion magique pour batte ché prochains adversaires, mais j a du mau à y croire