les protège cahiers
par minloute le, 12/03/2015Ecole primaire Loubet, avant 1970
Ché lives d’ école étotent arcouverts d'une espéce de papier kraft pour les proteger
Je sais pu si chéto fourni par l école ou si m’ mère ale allo les zacater à mon d’ chez Defernez , rue Anatole France
J a connu 3 couleurs, chéto soit vraimint couleur marron papier kraft, ou alors yavo bleu foncé ou rose pale
In tout cas ch’éto m’ mère qui s’ in chargeo au tout début d’ année scolaire, fallo canger l’ papier kraft d’ l année précédente
J’ la raviso faire, couper ch’ papier un peu plus grand que ch’ liffe, après ale coupo in haut et en bas comme eune languette , juste au miyeu pour l’ passer dans la reliure
Après ale sorto le scotch avec sin dévidoir, pi ale rabatto ché cotés, pour pouvoir après coller ché coins
Eune fo fait, ale collo l’ étiquette bin au coin, chéto pon des étiquettes adhésives, fallo mouiller derriere
Eune fo ch’ liffe arlié, ale soufflo, j’ voyo bin que chéto pas d’ gaité d’ cœur qu ale faijo cha, pi ale metto ch’ liffe sul’ coté
Et ale arcommincho l opération autant d’ fos qui yavo d’ liffes à arcouvrir et à la fin ale poso ch’ dernier liffe arlié sul’ pile en l’ claquant un peu, et in dijant « bin voilà » , min père auro été là i auro ajouté sin « merci Aspro » chéto eune ancienne publicité, i s’servo de ch’ t’ expression là quand qui finisso un traval qui li avo d’mindé d’faire grinmint d’ calculs
Après j avo les consignes : té ringes bin ché liffes dins tin cartape EN RAVISANT c’que té fait et pas en les incrinquant les uns dans les autes, que ché paches après ale zétotent toutes écornées…. Am’ connaisso par cœur ………
Retour à l école, bon tout l’monte y a arcouvert ché liffes ? i en avo toudis un ou deux que chéto pas fait, ché mères ale « zavotent pas eu l’ temps », ch’ maite i ralo intérieur’mint mais i exigeo que pour l’ lendemain cha so fait
Croyez pas que cha so finit, pasque ch’l’ instituteu i profito alors d’ nous faire faire d’ l écriture in sorte, pisqu i fallo arcopier CORRECTEMINT , not’ nom , prénom et classe su cha étiquette
Ch’ maite i passo après vérifier si chaque éléffe avot bin réussi et avo pas trop fait d’ ratures ………
Mi j avo ker ché protections d’ cahier comme cha, chéto un peu rapeux au toucher, in avo tous les memes
Ch’est en sixième qu in a connu un grand cang’mint , autant en primaire tout y éto strict, j’ me souviens, ch’ pitit cahier d’brouillon, le cahier du jour, le cahier de contrôle, chéto à couvrir avec des protèges cahiers, in plastique, mais avec des couleurs bin définies …
Autant en sixième, ch’éto un peu comme in voulo, pu d’ couleurs imposées, apparition du protege cahier en plastique transparent, abandon du stylo plume pour le stylo bille, apparition des garnoules qu in voyo à peine quand qu ale zétotent d’ l aute coté du mur d’ l école des files …..