si vous comptiez sur mi...
par minloute le, 06/04/2015si vous comptiez sur mi pour faire l éloge d' Pâques, faut pas s adresser à mi ....
pasque tout simplemint j a jamais eu trop ker l'chocolat, in tout cas pas à in minger des tonnes
alors j'a plutot l' souvenir que j'devo faire bonne figure quand que Madame Thueux, chéto djà eune personne agée qu ale habito "coron des veuves" , rue de Commentry, ale m ameno un lapin en chocolat
chte dame cha devo et' eune ancienne collegue d' traval à min père , j in a l' souvenir que ch'éto eune dame très gentile ...meme si j avo dro chaque année à min lapin ...
lapin ou poule in chocolat, bien sur y avo aussi Clara eune cousine à min père qu ale me rameno so un oeuf so eune poule
comminchez à connaite Clara au fil des histoires que j' raconte, Clara et ses cadeaux, Clara qu ale faijo toudis dans la démesure, ch' l oeuf d' pacques am'mote que cha devo et' un oeuf d' dinosaure , et si ch'éto eune poule in chocolat, chéto plutot d 'la taile d' eune dinde ou d'eune autruche ....
sans compter que ch' éto eune poule pondeusse, pasque tout autour dinch' panier in osier, yavo des tchiots zeufs
am'mote qu ale avo du faire l'guinsse eune paire d' jurs avant vu que, souvint chéto des zeufs avec d' l alcool d'dins, que cha , j avo vraimint horreur, que j allo arcracher tout d' suite
j' vous rassure, avec l'age, quand que j'a eu à gouter quéquosse avec d' l alcool, j'el gardo pour mi, mais cha ch'est un aut' sujet
in plus de Madame Thueux et Clara, j in avo un aussi par m' tante un aut' par m' mère , chéto la tradition, cor que m'mère ale m in acato un tout tchiot , ale savo que j' éto pas carnassier au chocolat d' Pâques
alors savez j a du développer ach' momint là des talents d' comédien ...
d abord paraite étonné quand qu in t' dijo , "j a quéquosse pour ti" ...
s' poser la question de quo cha pouvo et' en fronçant ché sourcils tout en intindant l' bruit d' l emballache en plastique quand qu ale sortotent l' friandisse d'ech cabas
à mi alors, comme à la comédie françaisse, ou au cours florent, d' montrer en eune fraction d' secontes, par eune série d' mimiques , toute eune suite d émotions
l' éton'mint d abord, pi l' contint'mint , cha chéto cor l' plus dur à faire, surtout quand que voyez que ch'est un monstre en chocolat qu in vous offre, qu in vous dit in plus , "t as vu comme y est bio !".....
et vous pindant ch' temps là , tout en souriant, in s'dijo "mon diu mais pour minger tout cha , j'aura pas fini avant la toussaint , vire, à la Noël" .........
après bin sur , m'mère , qu ale connaisso mes dons manuels, ale préféro arprinte ch' l'oeuf ou l' poule, pour ouvrir l'emballache
là té prenno tin plus bio sourire commercial et t allo imbrasser l' personne en li montrant toute t' joie, toute t' reconnaissance ......
que personnel'mint t auro préféré archevoir eune dringuelle , qu avec t auro pu t acater eune pochette d' soldats in plastique, pochette que t avo arpéré à mon d' chez Defernez , mercerie, objets funéraires, articles scolaires , martinets (si si) et jouets, magasin situé rue Anatole France...
bon bin sur fallo in minger d' vant la personne, j'em précipito pas d ailleurs, et m'mère ale le savo, ale me donno qu eune moitié d orelle d' lapin, ou ch' bec del poule
pi si meme ale m in donno plus, j' calo , mais ch'éto normal j' éto sinsé et' eune "bouque à chuque"
eune fo l' visite terminée, ch' lapin et ch' l oeuf i zallotent dins ch' bas du buffet et pour mi j' savo la suite par coeur
m' mère l' lend'main ale allo dire au momint du gouter " j' te sors ch' l oeuf"?
mi j y faijo comprinte que j in éto djà saturé avant d in minger
min père, qui éto dins sin fauteul, i acouto in faijant semblant d' pas écouter, et i demando alors innochamint am'mère " i reste du chocolat d' Pâques?"
avant que m'mère al' réponde , i dijo " si y en veut pas , in va l'laisser pourrir comme cha, donne me zan un morciau Odette"
m' mère " ch'est pas bon pour ti" min père " j in minche qu un tchiot morciau" et ch est li bin sur qui finisso ché chocolats
par conte , avec m' mère in éto complice , commint que j allo dire cha, quand qui yavo Clara ou Madame Thueux qui demindotent plus tard "alors ch' chocolat y éto bon ?"
mi j arprenno min role d' comédien, et devant m'mère, j' minto effrontémint, en dijan " ah ouais, vraimint y éto bon"
et d' vire m' mère qu ale opino del tiete, alors qu in savo tous les deux que chéto min père qui les avo mingés
ch'est l' seul coup que j' pouvo mintir sans m' faire disputer , et in plus avec sin accord tacite ...
in fait ch' chocolat, chti que j' préféro, j' va in decevoir , chéto pas l' cote d' or, nan , chéto l' "bon" viu chocolat d' la coop
eune tartine, du beurre d'sus, tro quate carreaux d' chocolat , savez chti qui éto strié sur l' dessus, eune aute tartine par dessus, et là mes gins, là jem' régalo ...