au coin del tape partie 1
par minloute le, 24/09/2015samedi au matin, j' bo min bol d' chocolat, avec mes tartines, beurrées, coupées dins l' sens d' la longueur..sans oublier un verre d' jus d' oranche, un vrai , pressé du matin
min père y a fini d'printe sin pitit déjeuner, y a cor l 'odeur , berk ,d'ech' lait i faijo cauffer jusqu à qui a eune couche d' sus ...que m'mère ale li servo in faijant l' grimace , que si ale avo pu avoir eune castrole avec un manche d' chinq mètes ale s in sauro servi ...
m'mère , cha fait un momint qu ale a mingé, ale a est assisse al' tape, avec un vieux journal d' la voix du nord étalé d'vant elle
ale épluche ché légueumes d' vant mi , cha sint fort ....surtout quand té bo té trimpe des tartines dins tin bol ...
bon carottes, cha va cor, porions aussi, mais quand qu arrivent ché navets et surtout ch' céleri .....cha sint fort, ch'est apre
mais m' mère ale fait cha "religieus'mint" , soit avec sin économe, so avec sin tchiot coutiau d' cuisine que rin qu à vire l' lame in voyo qui avo grinmint vécu ......
ale auro pu en canger, mais nan ale éto habituée avec ...
ale faijo cha à tape, pour rester avec nouzautes, biento ale alle s ' léver "hopédasse" comme ale dijo pour s encourager al' faire ..
pi artourner dins l' cuisine pour mette ché légueumes dins ch' grand faitout
ale metto l' viante avec, ale faijo cauffer, pi à un momint ale baisso ch' fu, et ale parto dins l' pieche d' devant querre s' popline ou sin mantiau, cha dépindo du temps, pour aller querre ch' pain à mon Maréchal
ch'éto l' dépot d' pain qui marcho l' miu au 2, su la rue anatole france, et yavo des zheures à éviter, fallo y aller vers 8h30 , pas après, sinan vers 10h30 , mais j'auro pas vu m'mère aller querre sin pain si tard , nan fallo que cha so fait "rapid'mint" , comme cha ale pouvo suiffe tranquil'mint l' cuisson d' sin pot au feu