L' toubac
par GJD le, 21/10/2015L’toubac.
Min père y fumot du toubac bleu et du gris. Y faigeot des roulées et fumot l’pipe. Souvint, à l’qinzin’, j’allos l’aquater pour li sus ch’boulevard Basly à un débit d’tabac qu’éj’me rappelle pu sin nom (y vindot aussi du vin et des journals j’cros ben). Mi, j’trouvos qu’cha puot, surtout l’pipe, quand j’étot jône.
Mais v’là ; à ch’t’ache là, fumer ché êtes grand et un tchiot, y n’a qu’un’ invie, ché d’grandir pour faire comme chés grands. Alors y arriv’ toudis un momint d’u qu’on va y goûter in cachette. Mi cha m’est arrivé aussi, naturellemint si qu’j’peux dire.
Alors que m’mère al étot su l’porte d’edvant à parler avec des voisines, mi, din l’cuisine, j’avos pris un’pétit’ pipe in plastic jaune (chelles ed’min père al puotent trop toutes froites dins ch’ratelier), qu’avot contenu d’el l’ pout’ acidulée qu’on pouvot aussi minger din des capsules roses ou blanques in pâte d’hostie, avec un’ palle.
J’bourre donc el’ pipe avec du gris, j’allume, et j’saque ed d’sus, un fos, deux fos, trois fos, et v’là que m’tête a s’met à tourner au point qu’j’ai du m’assir par terre pour pas kher.
Quand cha a été miu, j’ai ravisé m’pipe. Ch’fourneau y étot tout fondu ! Té comprinds à cht’heure pourquoi qu’j’étos comme in guinse, toubac plus plastic fondu, y avot d’quoi !
Faut êt’ arnéqué nan ? Pus tard, ché min comarat’ Fernand, qu’avot toudis des sous dins s’poche, alors qu’on étot din chés camps, in bas d’el rue d’Alger, qui m’a donné un’ P4. Parisiennes qui s’vindot par pétits paquets d’quat’.
J’ai pas trouvé cha bon mais j’étot ainsi grimpé din « l’équelle sociale ». Là d’u qu’cha a été l’miu ché quand on a pu s’aquater, in s’cotisant, des Ich lif’, des cigarettes inglaises ; Ch’tot écrit su ch’paquet : Hight Life.
Ch’tot meilleurs que des P4 mais cha m’a pas convaincu ed’ fumer, j’n'ai pu jamais porté à m’bouque ed quoi fumer.
GJD