L' marotte

L’marotte.
Quel est l’garchon qui n’a pas eu l’invie d’aller à l’marotte à l’occasion ? Pouvoir minger des kérich’s, des blettes (à ch’t’heure on dit des groselles à maquereaux et, intre nous, j’ai jamais vu un maquereau minger des groselles, surtout qui n’a pas dins la mer.), des poires, des pommes, bref tout s’qui pouvot s’minger sans payer.
Ché pas bien, j’sais, mais on a du plaisi à avoir l’ trennette à pas s’fair’ print’, ché comme cha.

Mais y a un aut’ marotte qu’on faijot et là, mainme si j’trouv’ l’canchon d’Alain Souchon « Sous les jupes de filles » ben bélotte, j’trouv’ que not’ façon d’dire cha étot ben plus poétique et imagée. Nous in allot à l’marotte à quéquette. Busis un peu là d’sus.

L’marotte chez l’interdit qu’on viole (té comprinds ?), un’ gourmandis’, un’ chucrat’, un’ invie qu’té soulach’ alors qu’t’as l’ pas l’drot, tout quoi ! Et l’quéquette !… Ah l’quéquette ! Quand té t’chiot, t’in parles sans vraimint savoir choqu’ qu’cha n’est.
Té sais al faut qu’ché ben et qu’ché interdit pasque ché du salop d’raviser indsous des rob’s d’chés fill’s. Pour cha, in allot din l’rue Marmottan in déchindant l’crinconne d’la Cavée.
Un peu après l’pharmacie mutualist’ des mineurs in prénot un’ p’tit’ voyette in face un peu plus loin. Ichi, j’fais un’ pétit’ armarque su l’pharmacie. Quand t’intros éd dins té t’trouvos devant un mur éd bureaux in bos tellemint haut qu’in véyot l’tiête de ch’pharmacien que quand y passot d’vant chés guichets qui arsimblottent plus à des meurtrières éd château fort qu’à aut’ caus’. On mettot sin carnet d’ordonnances din un’ boîte in carton et on attindot longtemps.

Pour arvénir à l’marotte, el’ voyette al’ passot à côté d’un’ arténue d’ieau qui, à c’qu’on m’a dit, étot les rest's d’un ancien bras d’la Lawe (in artrouv’ aussi des ruchots dins l’rue d’Amont édu qui avot des gardins derrière La Lawe). On y allot aussi avec un épuisette pour attraper des épinocs qui piquottent des Marie-grosse-tête, des salamant’s et des trytons noirs avec un vint’ jaune, bleu ou rouch’ . Après y avot un’ pétit passerell’ avec des traverses in bos qui étotent écartées.
Planqués in d’sou in attindot les bruits d’talons d’un’ femmes in espérant vir quetcaus’. Pas gramin in fait, et pas souvint mais quant’on veyot un peu d’blanc, ch’tot l’gros lot. In fait, ché cha l’érotisme. Ché l’idée qu’té fais de c’que té pourros arvétier sans t’fair’ vir. Du cinéma quoi !

Nous allions également au même endroit pour ce "spectacle" érotique . Pour augmenter le temps de vision ; l'un d'entre nous arrêtait les passantes sur la passerelle en demandant l'heure .