Noel ch'est fini

j' vous a pas parlé du 24 au soir , qu in voudro veiller , et qu in nous invo au lit , pas fatigué qu in jure , mate si mais énervé in plus ......
j' vous a pas parlé du 25 matin, des premiers pas dans l escalier quand que mes parints déchindotent in bas, ni du "déchint pas cor minloute" .... ni qui fallo cor après attinte qu' min frère qui s' leve et y éto pas al' presse ...

j' vous a pas parlé d' ché cadiaux qu in déballe fébril'mint....
j' vous a pas parlé du pitit déjeuner qu in prenno tous ensempe , in mingeant eune coquile .....

j' vous a pas parlé des préparatifs du repas, dem' mère qu in téno pu , vu qu ale éto tindue d'pas avoir oublié chichi ou chtilale, et qu in plus ale devo artrouver in meme temps ché barteles à min père ...

déplach'mint des tapes et des cayelles, mise en place d' la nappe , des assiettes .......

j' vous a pas parlé d' l arrivée d'em grand mère, d' la grand tante et du grand onque, d' Clara bin sur qu asteure , in tout cas les plus anciens i connaissent ...

nan , j' va vous parler des jurs suivants, du que les soeurs sont cor là, mais qu ale vont bientot arpartir ...

t arpars quand ? qu ale deminte m' mère, comme si ale savo pas l' date ou tout du moins qu ale sero arportée d eune journée ......

déjà ? qu ale dijo, mais tout d' suite après ale ajouto, faut bin rintrer un jur .....

min frère li y avo djà arpris ch' traval, et mi ch' pitit dernier, j' in meno pas large, bin ouais, j' essayo d'ete sache et d' pas enerver ché parints, qui pinsent pas trop vite à c' que j' comminche ché devoirs

chéto d ailleurs peine perdue ....

ch' midi là, après minger, ch'éto le grand départ, mais d'puis l' matin, l ambiance ale maison ch' éto pu cha, m' mère ale avo "réussi" à c'qui zarpatent après minger au lieu du pitit déjeuner, mais en faijant à minger un peu plus tot ....

cha y est chéto l' momint du départ, min père i arnifflo un peu , comme chi i arteno ses émotions, i faijo eune blague , pour "detende l atmosphère" ....
m' mère ale dijo " attindez me" , ale allo mette sin mantiau su ses écalettes , cor embrasser m'soeur et min bio frère et pi as' metto au coin del rue
d' là ale allo attinte que l' carette ale tourne et qu ale disparaisse au loin , vers l' déchinte d' la cote des grands bureaux ...

après ale rintro, sans dire un mot, fallo l' laisser tranquile , ale faijo l' vaisselle, ale avo pas voulu d' l aide, in fait cha l occupo

pi eune fo l' vaisselle faite, ale metto l' laisse ach' tchien et ale parto faire un tour avec

et ch'est au retour, qu in l artrouvo j allo dire comme avant , am' mote que cha li avo fait du bin d' et' tout seu un momint ....

direz rin d extraordinaire dins tout cha, j a jamais dit l' contraire, mais hier in a eu ch' grand qui est arparti, et "bizar'mint" j a arnifflé un coup et j a fait eune blague pour détinte l atmosphère ....et grand mère bin li a bin fallu eune paire d heures pour qu ale arvienne comme avant

étonnant non .....