leçons de choses

leçons de choses...ah cha do rappeler des souvenirs à ché anciens .tu..
in a appelé cha après "sciences naturelles" , am'mote que cha a cor cangé d' noms eune paire d' coups jusqu asteure ...

leçons de choses, chéto associé à un liffe d école , de messieurs Orieux et Everaere, savez, eune couverture verte avec d' sur un ozio qui vient à marote pour printe des quériches bin rouches sur eune branque ......

leçons de choses, vaste matière... mi j avo ker et pas ker, cha dépindo des sujets abordés

yavo grinmint d' dessins in couleur, cha j avo ker mais yavo aussi grinmint d' chosses à apprinte...

ch'éto amusant d' raviser ché zesquelettes ou s' qu' on appelle des "écorchés", mais après fallo apprinte du qui yavo ch' cubitus, ch' radius, ch' tibia, sans oublier ché deltoites, rotules et tout c' qu in s in suivo ...

cha cha allo cor, mais quand que chéto les fleurs ....mon diu...ch' pistil, ché corolles, j in passe et des meilleux, et qu in avo l' leçon après , interrogation écrite.......

j auro du m in douter au matin, j'voyo qui avo sorti s' machine pour faire ché polycopiés

savez l' machine du qu in metto d' l alcool d' dins, que cha sinto fort quand qui s in servo , qui passo des feules dans eune espece d' rouleau et qui actionno l'manivelle ...

eune tchiote impremerie ambulante...

mi j éto persuadé que chéto pour l'leçon du jur, alors quand que ch' maite , ch'éto Mr Sergent, école Loubet , batimint d' face, à l étache à droite pour ceux qui veultent des précisions....

quand Mr Sergent i commincho à distribuer ché feules et que j a vu que cha s' ressemblo grinmint ach' dessin d' l interieur d' la fleur qui yavo dins l' leçon, j a pas été l' seul à tirer min nez

am' mote que ch'maite i l a vu ,pisque i nous a dit, "bon j' espere qui yaura pas personne qui aura zéro, tout l' monte i sait au moins quo qu' ch'est un pétale".....

mi cha m a pas trop fait sourire, et y a des coups que j a répondu du genre "quite ou doube" comme l' nom d' l émission d' radio qu in intindo ach' transistor .......

mais ch'est comme au loto, j a jamais eu grinmint d' chances à ché jeux de hasard ........

ché fleurs chéto eune chosse, ch'est l' cas del dire , mais j' m intinds cor "buter" quand que j' devo réviser m' leçon avec m' mère .......

entre la panse, l' feuillet, la caillette, l' rumen , j avo du mau à les placer dans l' bon ordre .......

(j' do vous dire que j a été arvire sur un site, pasque j' me souveno que d' la panse )

pi tout pour nous compliquer la vie, ch' ruminant i minche, bon d accord, t as artenu à peu près l ordre dins sin stomaque, mais ch' t animal, ch'est l' cas del dire, vlà ti pas qui fait armonter c' qui a mingé, pi après cha ardéchint ...

ch'est comme ch' l'ozio avec sin gésier ...

am'mote que dieu y a créé cha aussi compliqué pour nous punir nous , ché eleffes d' classes primaires d' l école loubet , bruay les berdoules, cm1 ...

quo que j' garde en bon souvenirs de chte cours là, in avo un camarate, un peu famile tuyau d' poele, et un coup ch' maite y a d'mindé si quéqu un i pouvo ram'né des tétards

l aute y a bondi d' sin banc, tout fier, en levant s'main

quequ' jurs après i arveno à l école, tout fier, avec un séyau plein d' tétards

i avo été les querre dins zin coin qui connaisso, eune espèce d' marais , ou d' trou d iau qui yavo près d un terril

ch' maite i les a mis dins zin aquarium, et normal'mint , cha auro du devenir à la fin des garnoules, mais j a pas l' souvenir que l' expérience ale avo réussie jusqu au bout ....

j' m in auro souv'nu , des garnoules dins l' classe (j allo connaite cha qu en sixieme, mais chéto pas les memes garnoules)....

après in avo un cours sul' corps humain, mais bizar'mint , ni ch' garchon ni l' jeune file, représentés en train d' faire leu toilette dins zin baquet in feralle, bizar'mint et à not' grante deception, bin in voyo ni ch' raccord d' vélo du garchon ...

et cha s'ro pas cor aujourd hui qu in allo savoir commint qu eune "garnoule" chéto fait , disons "intim'mint" ...

par conte j a un souvenir que cha m avo bin plus, ch'éto l explication du chateau d iau

ch' maite i avo pris un bout d' tuyau , d un coté i avo mis un entonnoir, qui arprésento le chateau d iau, et i levo et baisso l' aute bout du tuyau, pour nous montrer pourquo l' chateau d io i do toudis et' au plus haut sinan l io ale monte pas ....