à l'arrière del carette ou tournez mes gins tournez 3

J’ vous avo laissé hier au niveau d’ merlimont villache, bon là du qui yavo l’ dernier obstaque pour arriver à la plage, fallo pas qui y a grinmint d’ carettes qui attintent pour passer …

Min père éto tindu, mi aussi d ailleurs, y n avo toudis un ou deusse, qui démarrotent pas assez vite, ou qui voulotent bin sur tourner à gauche du coté d’ berck , que cha impecho ché gins d’derriere d’ passer....

et que si i voulo aller à berck, i auro du tourner à gauche eune fo arrivé in bas d’ st josse et pas v’nir ichi imbeter ché gins qui voulotent aller à merlimont plage …

Yavo pu qu à printe son mal en patience, au coin ch’ éto ch’ café restaurant, chez valere, mi j’ dijo chez valerie, nan nan qu ale dijo m’ mère , ch’est bin valere, ch’est un prénom, mi j’ douto quand meme un peu, convaincu que chti qui avo fait ch’ panneau i avo oublié d’ mette un i ….

L’ temps d’ busier à tout cha, cha y est, j a sinti qu in prenno tro quat’ jets , in éto d un coup plaqués au fond dech’ fauteul, ch’ moteur i éto monté dins ché tours, et min père i lacho « l’ bolide » …

Cha y est , in a traversé, OUF , la délivrance, y avo pu rin qui pourro nous ralentir pour arriver enfin à la mer …


Cor 2, 3 viraches, sul droite meme in auro pu s arreter pour toucher ch’ sape, mais in éto trop pressé, nous vlà djà au bout , tout au bout de l avenue de la plage

Grante avenue , toute droite, rectiline, que j’ essayo d’ deviner l’ plus rapid’mint la couleur du drapeau qui flotto tout au bout au niveau du poste d’ sécurité

Su la droite, ch’ camping…

Min père éto tout contint, m’ mère ale faijo un sourire d’ circonstance, merlimont cha a jamais été sa tasse de thé, enfin si pour 2 jurs, mais après ale préféro s’ mason quand meme ..

Mi j éto comme min père, tout excité, là i d’ mindo am’ mère sin dernier bonbon « pour la route » , que m’mère ale li faijo un ravitaill’mint en vol....

ouais comme quand que le rafale i fait l’ plein in vol et qui continue à voler ..

Min père i conduijo et i ouvro s’ bouque pour que m’ mère ale li mette l’ bonbon, tout en restant maite d’ sin véhicule,

j’ vous jure mes gins que ch’est que la vérité vraie …

Bon m’mère ale ralo déjà , vu qu ale avo djà tout ringé, et qu ale teno dins s’ main les fameuses clés du « bonheur »

Mi j éto assis dins ch’ miyeu , tout contint d’ vire qu enfin in arrivo …

Su la gauche la grotte, ouais mes gins eune grotte arconstituée, pas forchémint d’ bon gout , mais bon….

Bon là j arprinds prudemmint m’ plache au fond derriere m’ mere, vu que comme pour ché zavions, vraimint in in sort pas, in allo commincher la procédure d attérissache

Dernier stress, dernieres inquiétutes, min père , commandant d’ bord , qui raviso à la fo l’ route pour bin vire du qui fallo ralintir, et pas louper l’ emplach’mint du qui allo s’ garer sul’ coté del route , avant qu il ale ouvrer ch’ portal

Et d un aut’ coté un eule such’ rétro , ralant djà si i n a un qui li collo d’ trop près , et mettant d’ temps in temps sin clignotant , pour signaler à ceux qui l’ suivotent que le véhicule prioritaire allo bientôt arriver à destination …..


La suite, ch’ est à dire l’ premiere journée d’ vagances j’ va l’ raconter à partir de demain

Mais j a d autes souvenirs d’péripes pour aller à merlimont

Un coup avec min père i avo perdu eune valisse qui éto queute del galerie entre saint pol et hesdin ....

Un aut’ coup min père i s’ a fait arreter par ché gendarmes à saint po pasqui avo passé à l oranche, min père i éto persuadé que ch’éto pas l’ cas, que ch’éto pas vrai, i éto rintré rapid’mint en rogne avec la maréchaussée, et y a pas fallu grand cosse pour qui so imbarqué , véridique mes gins véridique ......

Et j’ vous raconte pas la suite du voyache entre saint pol et merlimont , qui décoléro pas …….

D’ autes souvenirs de trajets , mais avec mon mononque, 2 voyaches au moins,

le premier dans sin « tank »

Ch’éto eune simca ariane , que carette ….

Eune gueule d’ requin, un intérieur d'une largeur que cha nous étonno, pas de sieches individuels aussi bin à l avant qu a l arriere

Un tableau d’ bord, comme ché revet’mint de sieche, à 2 couleurs rouge et crème

Pi j oublie pas la tchiote plaque de st christophe collée pas loin du volant …

Mais ch’ souvenir que j a d aute, ch’est un voyache en estafette ….

J éto à l arriere avec min cousin et j’ supposse qu in devo et’ armontés, qu in devo souvint demander quand que ch’est qu in allo arriver ...

et meme asteure si in m’ dit « montreule » j’ me vo dins l estafette , demander à mon mononque si in allo arriver, et là i dijo pour l’ premier coup « ouais et là in vo les premieres dunes »

Nouzautes à l arriere in a explosé d’ joie

et j arvo s’ tiete à mon mononque comme si d abord i avo été dépassé par not’ enthousiasme, qui nous a dit d’ nous calmer d un coup.....

mais qui s a vite radouci pour partager notre joie d’ bientôt arriver …