i zont disparu les buvards

cor à la fin des années 60, le buvard éto un élémint indispensape d'la panoplie de l écolier in classes primaires

in n 'avo plusieurs , chéto pas un par cahier, mais j' me souviens que j in avo un pour ch' cahier d' brouillon, un pour l' cahier du jour, et bin sur un aut' pour ch' cahier d' compositions

i éto inséparape du porte plume qu in utiliso cor, savez ch' porte plume in bo,qui yavo plusieurs coloris, in aparlera plus tard

mais ch'éto pas n importe quel buvard qu in pouvo utiliser, cha dépindo d' ché maites

in n' a chéto absolumint des buvards sans marques, des buvards qu in allo acater à mon Defernez, eune tchiote pochette plastique que d'dins yavo des buvards d' differentes couleurs, mais que d' su yavo rin d écrit

d' autes maites i s in foutotent , et in pouvo utiliser n importe quel buvard
et à l époque faut dire que grinmint d' commerces i zoffrotent des buvards publicitaires ....

t allo ach' pharmacien, t avo un buvard de la marque urgo, j' m in souviens cor bien d un modele, du qui yavo eune scène d' chasse avec un sanglier, un chasseux qui éto blessé du qu' vous pinsiez et qui yavo du sparadraph ach' t implach' mint là ....

quand qu in allo querre de l io ou del biere à mon willaume, bin in avo par momints un buvard del biere pelican, ou un aut' que j' a ko bien in tiete, pierval l eau de votre bébé, chéto un buvard bleu clair, avec l' tour bleu foncé

y avo d autes marques, des marques d' piles, des marques d' fromaches, avec des dessins souvint bin rigolos .....

yavo aussi des buvards j allo dire locaux, du qui avo l' nom d' un magasin d' bruay, j' me souviens de buvards de chez opigez tissus, de chez faidherbe, d' la bonbonniere, et de chez cendrillon

cha faijo l objet j allo dire d un trafic, tout au moins d un échange inter nous , so par un simple troc, un conte un, quequ' fo un conte deusse, et queque fo fallo sacrifier eune tchiote pieche d' 5 centimes d' sin argent d' poche pour faire l échange

d ailleurs ché parints , in tout cas les miens i zétotent pas trop cauds, suffiso que m' mère in parcourant mes cahiers qu ale trouffe un buvard qui éto pas au départ d' chez nous, que j avo dro à un interrogatoire poussé .....

après avec ché buvards, y a des fos in juo avec, eune fo que ch' maite i raviso pas, in faijo expres de laisser l' pleume such' bord , et d' raviser l encre imbiber rapid'mint ch' buvard au coin .....

d' autes i s amusotent al' garder l' plus longtimps possipe , jusqu à qu in vo pu l' dessin ou meme l' couleur originelle dech' buvard , mais là ch' maite y veillo quand qui faijo ché dictées, et cha dépindo s' n humeur, y a des coups j' me souviens qui avo pris d un air dédaigneusse, et par un coin un buvard qui arsimblo à pu rin tel'mint i yéto rimpli d encre, et l aute i avo été puni

pi en cm2, ch' maite un coup,toudis lors d une interrogation, j' sais pu laquelle, mais y avo du vire l' comportemint bizarre d un éleffe, et i éto arrivé sur li , sans rin dire et yavo saisi sin buvard, que d'sur, yavo des anti seches ......
cha avo fait un foin, in avo du rinte nos buvards tout d' suite, que l aute aussi yavo été puni

au tout début des années 70, l' porte plume, l encrier, et sin compagnon l' buvard, i zont été ringés au fond des placards ....