champ, gardin, des porions à ché fleurs 2
par minloute le, 24/04/2016J’ va pas vous zarparler d’ tout cha dans le détail, mais quand que j’ pinse à ches momints là…..
y a l’ chant des alouettes qui m arvient, l intimité avec min papa à minger avec li des quartiers d’ pomme qui coupo méthodiqu’mint avec sin coutiau
Pi l’ retour al’ mason, eune fo l’ pente du champ armontée, j avo l’dro d’grimper dins l’ brouette , d’ m’installer au miyeu des plantoirs, greffoirs , ratiau et louchet ……..
Comme j éto fin benache ach’ momint là......
m a fallu du temps pour comprinte que min père aussi i devo et’ aussi heureux qu’ mi ...
In avincho cahin caha, min père avec s’ gampe raite, cha faijo un tchiot peu monter et ardéchinte l’ brouette à chaque pas
In plus y avo pas grinmint d’ confort , ch’est l’ moins qu on puisse dire…
Brouette toute in bo, avec cotés (in bo) amovipes, role in bo avec eune bande in fer tout autour , que cha faijo grinmint d’ bruit quand qui avincho sul’ route
Mais chéto loin d’em déplaire …….
Min neveu y a eu dro aussi bin des années plus tard, au tout début des années 80 .....
i avo eu d’ ailleurs eune photo d’ prisse , avec li dins l’ brouette, et , au dos d’ la photo , min père avo marqué « un bon momint » , cha voulo tout dire ……..
Au milieu des années 80, ché champs du qui éto min père , i zont été arpris par ch’ cinsier, yavo djà moins d’ monte qui i venotent d ailleurs ….
I auro pu avoir eune aut’ parcelle un peu plus loin, mais là « j’pinse » que pour li cha deveno trop dur d’ s occuper à la fo du champ et d’ sin gardin …..
Alors i s a consacré uniqu’mint à sin gardin , cha l arringeo aussi faut dire, l’ mason éto juste à coté et pour arroser chéto plus facile pour li ……
Faut dire que j’ me souviens d’ ses arrosoirs attachés in batterie dins s’ brouette quand qui parto au bout del rue, in auro dit "manon des sources"
cha commincho à li peser dins les bras , i éto quand meme né en 1911…….
Zallez aller dins min sens en dijant, ouais ch’est miu d et’ à coté del mason, comme cha pour arroser i auro qu à brancher ch’ tuyau au robinet …….
Mon diu que malheur ! mais non mes gins !
Yavo les « cérémonies » du samedi après midi, les séances d’ bain ………
Ch éto l époque du qui avo pas cor d’ salles d’ bains dins ché masons, avant les fameusses rénovations ….
L’ samedi après midi jéto l’ premier à m’ laver dins l’ cuisine, dans un grand baquet en plastique …..
Eune fo que j avo fini, j’ devo donner un coup d’ main à min père pour mette chte contenu dans un vieu baquet en ferale
Meme opération après l’ bain dem’ mère pi l’ bain d’ min père…….
Après i s in servo pour arroser sin gardin, in pourro accroire que ch’ t’io savoneusse cha allo affaiblir ché légueumes, ou tout au moins leur donner l’ gout d’ savon....
bin j a a pas du tout l’ souvenir …..