champ, gardin, des porions à ché fleurs....un salut bin amical à Vital
par minloute le, 25/04/2016 Champ, gardin, des porions à ché fleurs ……. Ch’est presque fini ...
J a pris grinmint d’ plaiji à écrire cha , am’ souvenir d’ tout cha, ch’éto m’ n infance ...
Comme d habitute, pas d’ brouillon, j écris directemint sur word, pi après j’ el mets sul’ site
Je teno à armercier du fond du cœur min camarate Vital
Vital t as mis sur tin compte facebook, eune photo d’ tulipe perroquet
j avoue que j in avo pas arvu d’ puis un momint et d un coup cha m a fait arvenir in arriere , 50 ans plus tot, au bord dech’ gardin
Tout au long de l année , au travers d’ tes photos , j a ker suiffe l évolution d’ tin gardin, surtout d’ vire tout c’que té fais en utilisant des matériaux d’ récupération
Et ch’est maintenant que j’ me rinds compte que tin gardin, tes astuces, l amour d’ tes fleurs , l esprit d’tin gardin, chéto pas loin d’ chti d’ min père………
Champ, gardin, des porions à ché fleurs …..ch’est presque fini ....
Min père , dans sa 93 ème année, y a décidé d’ nous quitter
Au matin, avant la cérémonie, j avo été dinch’ gardin
ch’ est bete mais j a eu l impression que ché fleurs am’ ravisotent tristemint
J y su arvénu tout d’ suite après pour cueillir eune fleur d’ chaque sorte qui yavo ....
j a fait un tchiot bouquet et min père au cimétiere, y a pas parti tout seu………..