les 3 expressions favorites à min père
par minloute le, 18/05/2016savez quand qu in est tchiot , in ravisse pas toudis du qu in met les pieds, suffit in plus qu in a un lacet d' défait et qu in marche d' sur ..
ch'éto m' n habitute, pasque faut avouer ..... que j a eu du mot à faire mes lacets ...
qu' min père i m' parlo toudis qui faudro que j' so ENFIN pret pour faire min service militaire, que m'mère ale sero pas toudis là à mes cotés
bref, quand que j' quéyo à terre, et que j' rintro al' mason, genou in sang et en brayant ...
min père, docteur émérite des zurgences, dijo, en baissant à peine sin jurnal qui liso, i dijo d un ton péremptoire " FROTTE UN COUP" et i armonto sin jurnal pour continuer à lire
facile à dire cha, ch'est pas li qui s éto claqué s' guiffe su ché carreaux d' el cour ou du gardin
m' mère nan, ale arrivo tout' d' suite , plus vite que l' smur, et l' samu réuni ...
enfin au plus vite qu ale pouvo l' faire vu qu ale marcho avec ses pieds in canard ...
et un coup meme ale avo accroché au passache eune plante, que min père i avo ralé bin sur , as' deminder si ch' pot cassé à terre, chéto plus important qu' min g'nou ...
alors si vraimint chéto plus graffe , i rajoutto qu' mots as' formule , cha faijo "FROTTE UN COUP CHA VA D ALLER"
Ouais mais mi j brayo toudis , d avoir du mau à mes g'noux, pi d' savoir que m'mère ale allo arriver avec s' trousse , avec coton qui drot file, pi des tchiotes bouteles que ch'éto sur que cha allo piquer sul' plaie .....
deuxieme expression fétiche d' min père "CH EST PAS EUNE BROUETTE"
là aussi cha m éto adressé, vu que j éto c' qu on appelle un brizaque , que j' el fasse d expres ou pas, j' casso tout , ou au moins cha duro pas longtimps
oh combien de jux , téléguidés ou nan, j a rapporté à min pere pour qui l' répare, que pour li l' bricolache ,chéto pas s' tasse d' thé ou d' café ...
j avo dro aussi à ch'est pas eune brouette, quand que j arclaquo trop fort, à sin gout l' portiere del carette ...
faut dire que j avo été (mal) habitué, vu que l'premiere carette qu in a eu chéto eune 403 break et ché portieres chéto pas del gnognotte comme asteure
ch' éto un vrai tank , alors pour vin freumer l' portiere, fallo printe sin élan
donc quand que plus tard in a eu eune 204 pi eune renault dousse, j avo cor l' sale manie d' arclaquer l' porte avec forche, et in plus inter temps j avo grandi et j avo cor plus d forche bin sur
ASSASSIN !
nan , rassurez vous, ch'est pas cont' vous que j' dis cha, nan i dijo cha quand qu in respecto pas sin gardin..
suffijo qu in tire dins ché fleurs avec l' ballon , et qu in in foute in l air....
suffijo qui nous voyote dins sin gardin, à progresser inter ché routes d' porions ou d aut'cosses, pour aller y arquerre ch' fameux ballon qui avo fini s' course à cht indro là...
in avo dro à chte fameux "ASSASSIN" , que m'mère ale avo vraimint pas ker qui employe ....