huile d' friture ou végétaline ?
par minloute le, 25/06/2016Végétaline ou huile d' friture ?
Nan mes gins j' va pas vous parler cuisine mais paradoxal'mint j' va vous parler d' vélo ,,,
après avoir eu un tricycle, pi un bio vélo d' couleur rouche acaté in haut d' la rue lamendin...
comme j allo avoir 13 14 ans, j a récupéré l' vélo d' min frère, un vélo d' course, mais bon comme yavo 15 ans d écart inter nous deux, ch' vélo y éto pas d' premiere génération
et cha faijo un bon momint qui avo pas connu ch' goudron, remisé, j' devro meme dire, suspendu in hauteur dins ch' garache au bout du gardin ,,,,,
j pouvo pas m in servir tout d' suite , y a du et' armis en état, et pour cha min père i connaisso LA personne qui pouvo nous faire cha,,,
chéto Monsieur Finet
Monsieur Finet i habito au 20 d' la rue, in rintro chez li par l' tchiote porte qui yavo sul' coté
tchiote porte qui donno sul' cour intérieure, du que chacun , à l abri du regard dech' garde , avo aménagé ses barraques ,,,
autant à l 'extérieur , fallo que toutes ché masons ale so pareles, malheur à chti qui décido d ' mette un coup d' peinture sul' facate ou en soubass'mint
(j' me souviens cor , au r'tour d' l école, d eune prise d' bec entre ch' garde et un qui avo mis del peinture blanque su sin mur d' cuisine ,,,
faut dire que ch' gars i éto pas bin malin, vu qui habito au coin, yavo rin qui pouvo camucher ses invies d artiste,,,
mais arvenons à not' histoire ,,,,,
min père i avo fait réparer ch' vélo par ch' monsieur là, pi quequ' mos après j' sais pu c' que j avo fait , mais j avo cassé quéquosse d' sur ,,,
min père i l avo améné, et en arvenant i m avo dit que ch' vélo i sero pas fait avant l 'lendemain, que j avo été , paraît il , un vrai brisaque ,,,,,
et que j' avo pu qu à aller l' récuperer en arvenant d' l école
mi Mr Finet, j el connaisso pas grinmint, ou plutot y éto plutot réservé, nan pas qui éto timite, mais meme si i dijo pas toudis c' qui pinso, cha s' voyo sur sin visache ,,,,
j' éto pas à l aise l' lend'main quand que j a été arquerre min vélo , j' traino presque ché pieds, bon l' rue ale éto pas des plus longues, et meme en avinchant pas vite, cha y est y a pu qu à s engager sul' coté del mason et d' buquer al 'porte in bo
yavo eune palissate in bo entre ché deux masons , avec eune porte in bo pour chacun, pour Mr Finet, in pouvo pas s' tromper vu que sul coté del porte , yavo un papilon in fer forgé noir qui éto cloué in haut
in pouvo pas s' tromper non pu, vu que eune fo que t avo buqué al' porte et que té rintro timid'mint dins l' cour, yavo eune forte odeur d' graisse à vélo , d' cambouis, vu qui réparo aussi ché mobylettes
ch'éto sin passe temps al' retraite
donc j' rinte , et j' m approche d' sin atelier, in y voyo tous ché zoutils accrochés à ché murs
i éto en train d' réparer eune mobylette , j' éto djà pas trop à l aise, mais in plus y avo un vigin que j' connaisso bin, un artraité aussi
j ' m approche pour printe min vélo, et j' voyo bin qui avo quéquosse am' dire, in voyo bin qui éto pas trop contint de commint j avo malmené min vélo ,,,,,,,,
alors i m' montre min vélo qui éto réparé, mais avant del printe i m' dit
« té sais, si t'chaine ale avo été intretenue régulier'mint , cha sero pas arrivé »
pi i rajoute « ch'est simpe, quand que té roules et que té sint que cha sint l' huile d' friture , ch'est que l' chaine ale a besoin de rien, mais si té sins plus rin, faut l' graisser »
j a du faire eune drole d' tiete, que l aute voisin i m' dit , té vo bin ch' que c'est l' huile d' friture quand meme ?
Bin nan que j y réponds
bin Odette (l'prenom dem mère ) ale fait ché frites avec quo ? , qui m ardeminte ch' voisin
bin d' la végétaline ,,,,,,,
alors là quo que j avo pas dit, meme Mr Finet , qui éto pas un grand expansif, cha la bin faire rire, cha les a bin fait rire
et pour infoncer ch' clou, i rajoute, j' comprinds asteure que l' chaine al' coince, si té mets del végétaline ,,, et les zarvlà à s' moquer d' mi ,,,
j a arpris min vélo , tout penaud, pas trop contint d' m' et' fait moqué
j arrive à mason, et min père i a vu que j' tiro la tiete, mais y a rin dit, mais comme l' rue ale est pas grante, l' lend'main au soir, au momint qu on mingeo , min père i a armis sul' tapis ch' t histoire là, qui a raconté alors am' mère ,,,
double punition, qu après cha m a tel'mint marqué, que j' avo toudis les cotés d' mollets plein d' huile d' chaine , tel' mint j in metto , d' peur d 'devoir aller artourner vire Mr Finet dins sin atelier ,,,