le haut folin , le cret de la neige,

le haut folin, le cret de la neige, j auro pu cor ajouter le puy de sancy, le signal de Toussaines , etc etc

ch'éto le nom, d ailleurs pourquo j' utilisse le passé, j' devro dire, ch'est le nom de principaux massifs montagneux de France

ch' éto des noms qu in devo apprinte à l école

j' vous concède que le haut folin et le signal de Toussaines, j' les za artenus pasque chéto des noms et des massifs pas si connu qu' cha , ch'est les sommets du morvan et de la bretane

le morvan, j' poso cor l' question am' file d' 15 ans qu ale a eune très belle moyenne en histoire géo

quand que j a parlé du morvan, et du que ch éto, ch'éto comme chi j' li demindo les noms des principaux sommets d' la planete mars

"nous in étudie pas cha" , sur qu asteure i zabordent ché thèmes d' façon plus généralistes...

sans vouloir et' dins l'courant du brexit, ch'est bin d' connaite c'qui a dans l' monde, mais au départ cha sero pour mi un minimum d' connaite sin pays

pour nouzautes, que che so l histoire ou la géographie, en primaire in étudio que la France

in connaisso l' nom d' tous ché massifs, des principales plaines, in suivo le sillon rhodanien, in déchindo la seine et ses affluents ....

in appreno du que chéto le plateau de langres, le mont gerbier de jonc, le seuil du Lauragais, le mont mezenc, le massif des maures et celui de l esterel .....

in avo appris que la garonne ale preno sa source en espane , et le rhone , en suisse

in connaisso les principales villes qui yavo tout le long de ses grands fleuves qui traversotent not' pays ....

in connaisso meme le nom des régions, et meme de c' qu in pourro appeler des "pays", comme l auxois, le queyras, la camargue...

in savo que telle vallée ale éto prospère grace aux alluvions, mais qui yavo aussi du progrès in route grace à tous ch barraches, j avo artenu le nom de chti de donzeres mondragon , qui donno plein d' stricité à toute la vallée du rhone

en histoire in avincho en suivant les conquêtes du pays, in voyo le tchiot royaume de France , de l ile de France meme ..

mais grace à des rois comme louis onze, pi louis quatorze, la France avot agrandi ses frontières ...

in géographie , ou alors chéto pététe en instruction civique, in savo situer tous ché départemints, in savo l'nom des préfectures, et l' nom d' certaines sous préfectures .....

asteure, l enseignemint ch'est pu comme cha , tant miu d un coté, pasqu in a été à un momint trop centré sur la France

vous m'direz chéto pas la meme époque, et pi ach' momint là , in éto cor eune vraie puissance mondiale, avec ch' général de gaulle comme figure emblématique .....

mais comme souvint, quand qu in a fait un coup d' barre à gauche, in in fait un aute aussi fort dins l aute sens ...

asteure faut connaite d' façon mondiale tous les sujets abordés , ch'est bien aussi

mais faudro un juste miyeu, et in peut comprinte sin pays que si in l' conno quand meme un peu, et qu in sache au moins du que le morvan i s' situe in France

croyez pas ?