in va péter les plombs

Quand que j' dis qu in va péter les plombs , ch'est eune fachon d' parler ,,,

souvenir d infance, ch' compteur électrique dins l' couloir

2 grosses boites noires fixées sur un support en contreplaqué

j' m in méfio pour plusieurs raisons

d abord m' mère ale m avo dit qui fallo toudis faire attintion d' pas artirer ch' plomb scellé qui yavo such compteur

pasque si ch éto l' cas , l' monsieur qui veno arléver ch' compteur i pourro accroire qu in l avo trafiqué et qu in pairo eune grosse amente ,,,

drole d' boite à secret quand meme, j' me metto sul' pointe des pieds pour raviser tourner l' roue dintée ,,,,,

vous dire si ch'éto cor l époque du 110 volts ou si in éto djà passé au 220 , mais l' stricité , cha faijo cor des siennes par momints

ch' système i devo et' moins fiape qu asteure, ch 'est sur ,,,,,,

problème d' surtension, ou « coup d' caud » comme dijo min père, mais bin plus souvint qu' asteure in intindo ch' fameux « clac » dinch' couloir

et si cha s' passo au soir , cha tourno presque al' tragédie grecque ,,,

in raviso l' télé, et d un coup , au meme momint que t intindo ch' « clac » du boitier electrique, tout i s arreto d un coup, l' télé, ché leumieres, et in éto plongé d un coup dans le noir

m' mère, le noir , chéto pas sin truc, alors tout d' suite, presqu' d' panique, ale crio « Léonce cha a sauté » , min père, ce héros au sourire si doux , comme i aimo li meme rajouter , i li répondo énervé « bin j' l a vu Odette » ,,,

alors là fallo i qui artrouffe ses chaussons, qui s' arleffe, avec s' gampe raite, m' mère qui rajoutto «  fais attintion à pas querre » et min père qui in armetto eune couche «  bin ouais Odette »

c' qui l impécho pas d' « foute un coup » à l' desserte à roulettes du qui yavo ché apéritifs dinch ' salon

in fait i zavotent chacun eune mission, min père i allo d' abord querre l' lampe d' poche, de marque Leclanché, chéto inscrit such' boitier , pour artrouver insuite ch' bougeoir et l' boite d alleumettes

eune fo qui rameno cha dins l' salon, i alleumo l' bougie, mais fallo l aider pour tenir l' lampe pendant ch' temps là et t avo interet à bin l éclairer et pas juer à éclairer ch ' plafon, sinon té l intindo raler cor un coup

cha y est l' bougie ale est alleumée, mais ch'est pas pour cha que m' mère ale so beaucoup plus rassurée, té voyo qu ale éto loin d et' à l aise, et ale arreto pas d' souffler que min père un coup y a voulu faire d l humour in li dijant qui fallo qu ale arrete pasqu ale allo éteinte l' bougie , mais ale avo pas beaucoup apprécié

mi j avo cor ker ch' te situation, té sinto que ch'éto pas l' situation révée , mais d un aut' coté, cha faijo des arabesques su ché murs, cha juo avec les zompes et mi j avo ker cha ,,,,,

seul'mint après min père i allo faire un premier essai à aller arléver ch' bouton du compteur, cha rassuro pas trop m' mère, ni mi en fait, pasqu in avo toudis peur qui prenne un coup de stricité, in plus ch' bouton, fallo vraimint bin appuyer d' sur pour l arléver ,,,,,,

in savo tout d' suit si cha marcho, bin sur tout d abord pasque l' stricité ale éto pas arvénue, mais aussi par un « meeeeerrrrrdde » , escusez me , mais ch'éto comme cha, preuffe que min père i devo asteure mette in marche le plan b

ch'est à dire aller dins ch' buffet aller querre , printe dins sin tiroir , eune pince et du fil d' plomb

ch' fil d' plomb i éto inroulé autour d un rectangue en carton léger

de là , i allo raviser lequel des fils d' fusipes avo sauté, i le rameno dins l' cuisine et là fallo l éclairer l' temps qui dévisse d' chaque coté, qui réinstalle l' nouviau fil, qui arvisse tout cha , et qui aille l armette in plache dins ch' boitier

là ; ch'éto l épreuffe de vérité, i rappuyo such' bouton et là, miraque, fiat lux aurotent dit ché latins, la lumiere fut

mi j éto fier, i éto fort mon papa

et quand qui arveno dins l' salon, in auro dit qui avo sauvé le monte,,, m' mère ale le raviso comme Bernadette Soubirous, qu ale a vu la Vierge Marie pour la premiere fo, un regard entre soulag'mint et admiration ,,,,,

du coup, l' bougie ale servo pu à rin, là j avo dro à l éteinte, mais in faijant attintion d' pas l' renverser, ni à pas trop m in approcher, cha auro pu inflammer m' quémiche d' pyjama ,,,

j avo ker sintir l odeur d' el bougie quand qu ale s éteigno ,,,

tout cha, ch'éto dans l' meilleur des cas , après pouvo avoir commint qu in pourro dire , « d zimpodérapes » ,,,

comme quand qui arrivo à sin tiroir et qui trouvo pas ch' fil à plomb et qui devo in plus , arsortir, traverser l' cour, aller dins eune d' ses barraques , raviser dans un d' ses cageots si y en avo cor ,,,,

là mes gins , fallo pas l énerver ,,,,,,,,,,,,