de Buromunster à Rabat en passant par Athlone

In parle souvint d' progrès, et quand qu in arparle de ch' qu in a connu étant tchiot , in passero bientôt ( si ch'est pas déjà fait) pour avoir rincontré des dinosaures au coin del' rue, ou tout au moins qu in auro connu le temps du qui y avo cor des dragons su terre ,,,,,

la preuffe, quand que j' comminche à raconter l arrivée du premier poste d' télévision al' mason ( de marque Radiola), ché zinfants im' ravissent cor si j apparteno au flime su le seigneurs des anneaux ,,,,,,

mais voyez vous, yavo à not' époque , un apparel électrique , dont ché performances ale zont jamais été égalées ,,,

si, si mes gins, j' parle du poste d' radio , ch' poste « fixe », qui sera après détroné par le transistor et la généralisation des téléviseurs

ch' gros poste , savez , ch'ti qui trono dans la salle à minger , chti qu in alleumo au momint des informations nationales, à midi et au soir pour s' tenir informé

chti aussi qu in avo ker acouter, soit pour des émissions d' jeux , radiophoniques comme in dijo, avec Jean Nohain, Saint Granier, Raymond Souplex, sans oublier Zappy Max ,,,,, la fameuse Famille Duraton, Quitte ou Double etc etc ,,,,,,,,,,,

ché postes là i zavotent eune certaine magie, ch'est pas pasque t appuyo such' bouton que cha demarro au quart de tour ,,,,

fallo que ch' poste «  i cauffe » , chti qu in avo al' mason , yavo sul' coté comme eune farniete, et fallo attinte que l' farniete ale devienne bin verte , pour qu in puisse enfin intinte ch' programme

cha nous choquo pas à l époque d' devoir attinte quequ' secontes avant qu' cha marche, asteure in fero presque un procès , faut qu' tout i marche tout d' suite , au quart d' seconte ,,,,

mais voyez à raviser l' plaque qui yavo entre ché deux gros boutons , là such' devant, yavo d' quo réver ,,,,, d' quo voyager,,,,,,,,,,, et d' quo s' poser l' question du progrès

quand que j' dijo qui yavo d' quo réver et d' quo voyager, ch'est que les noms des stations qu in devo pouvoir capter , ch éto pas la porte à coté ,,,

Moscou, Alger, Rabat, Londres, Lisbonne, Munich, Bucarest , Prague pour les plus connues ,,,

mais yavo aussi des indrots qui fallo cacher après sul' carte pour savoir du que ch'éto , par exempe Sottens (en suisse ), Hilversum (au pays bas), Droitwich (cha ch'est en angleterre, du qu in fait l' sauce qui pique, savez dans le worcestershire), Buromunster ( in suisse aussi ) ,,,,

et pour terminer Atlhone , qui s'situe en irlande ,,,,,

yavo d écrit sul' coté du cadran, GO PO OC BE ,,,,grandes ondes , petites ondes, ondes courtes et BE j' sais pas à quo cha correspond ,,,,,,,,,,,,

aut 'magie, l interieur d' l apparel, j' l avo ouvert pour essayer d' comprinte commint que cha pouvo marcher, commint en tournant un bouton, in pouvo capter des gins qui parlotent à l aute bout du continent européen ,,,,,,

in l ouvro par l arriere, et là in avo l impression d' vire l interieur d eune ville du futur, avec des grantes ampoules oblongues, des fameuses galenes ,,,

j' m amuso à tourner ch' cadran des stations pour vire tourner des pieches à l intérieur , mais la magie éto toudis aussi obscure pour mi, impossipe d' savoir commint cha marcho ,,,,

taleure j' dijo qu in pouvo s' poser la question du progrès ,,,,,,,,

prenez j allo dire un transistor, mais rin que vot' poste d' radio dins vos carettes, in parle que de FM , in devro dire « modulation de fréquence » ,,,,,,

sur qu asteure ch son y est meilleu, mais j' sais pas si in a cor grinmint d apparels d' radio d asteure, qu in pourro cor capter Moscou, Rabat ou Athlone ,,,

à méditer mes gins ,,,

Sur les Postes
BE voulait dire Bande Etalée.
Il y avait aussi sur certain poste la touche PU pour Pick-Up.
Sans oublier "l'œil magique" sur le devant du poste" dont j'ai déjà parlé sur ce site.
A l'intérieur une antenne ferrite orientable pour les grandes ondes et petites ondes;