au montana

savez mes gins, un d'mes reves ch' est d aller faire du bidet au Montana ... nan , ch'est sérieux

faut dire que quand qu in éto tchiot in voyo un genre d' flims qu in fait pu, les ouessternes

attention mes gins y a ouessternes et ouessternes, j' parle des "vrais" d' ceux d avant 1970, et cor j'a eune préférence pour ceux d avant 1960

savez ché flimes du que les couleurs étotent bin "tranchées" , chéto meme un argument qu in metto au début du flim

flimé en panavision, flimé en technicolor , j in passe et des meilleures ....


quand que chéto "rouche" chéto "écarlate" , les prairies "vert citron", ché zarpes "vert épinard"

rigolez pas mes gins, j a ravisé ché couleurs sur un nuancier ....

chéto pas des peaux rouches qu in voyo, plutôt des peaux oranche à croire qui s étotent enduit l'corps d' mousse d ambe solaire

savez l ambe solaire qu in metto à la plache pour avoir d' coups d' solel .....

ché coboles, i zavotent souvint des vestes avec des grantes franges, des étuis à fusil comme ché zindiens.....

grands espaces du que les troupeaux d' bisons paraissotent tout tchiots comparés aux montanes enneigées du que ché sommets semblotent infranchissappes.....

grantes rivieres indomptapes entrecoupées de rapites....

masons des fermiers toutes in bo, faites en rondins, avec ch' puits devant ...........

la famile de pionniers chéto toudis la meme, la femme, eune grante blonte, avec eune queue d' bidet , toudis en retrait , l imache meme d' la "bonne" ménagère , mais bizar'mint pourrez raviser que meme si ale vit dans un indrot magnifique mais isolé, ale porte quand meme eune tonne eune rouche à lèves sul' bouque

d' ailleurs vu les couleurs bin marquées, ch'est c' qu in vo in premier, s' bouque toute rouche, aussi rouche qu' l' ruban qui artient s' natte d' caveux

deux zinfants en moyenne, à chaque coup un garchon et eune file

pour que cha passe bin ,la file ale est rousse avec plein d' taches d' rousseur

quequ'fo y a meme un tout tchiot qu on devine plutôt qu in vo, pasque l' femme ale ayonne ch' berceau in bo et qu après qui brait pu .....

sans parler del' quéminée en grosses pierres , du qui a à l intérieur un grand fu, avec eune marmitte, du que d'dins ya des haricots qui cuissent .....

et qu après i finissottent à la lueur de faibes chandelles, sul' tape (in bo), dins l' fond des écuelles (in bo), mingés avec des cuillères (in bo ) par ché gins assis sur des bancs (in bo) ....

(me dites pas que ch'est pas vrai, mi j avo d'mindé am'mère d' minger min cassoulet avec eune cuillere in bo del cuisine, mais ale avo pas voulu .....)

souvent y a un viu aussi , barbu , avec s' pipe in bo comme y a eu plus tard Popeye ...

ch' viu li , vu l état d' es' quémiche cha do faire plus d' 6 mos qui l a pas artiré d' sin dos .........

j allo oublié del dire tel'mint chéto évident , qui éto assis su sin rocking chair su la terrasse del barraque ....

monde idyllique, paysaches de reves, le bonheur quo ..........

MAIS POURQUO fallo toudis qui a , ach' momint là, eune flèche indienne, qu ale vienne s' planter d un coup, dans un randin del mason (in bo) ?

a chaque coup, chéto sine qui allo y avoir del bagarre ...