fautes d' français à l'Élysée

zavez suivi cha mes gins, lors des vœux de François Hollande, chti qui s occupe d' la communication présidentielle, y reprenno les principales phrases du discours, sur twitter , j cro bin

et ch'éto bourré d' fautes .... à accroire qui yavo pas ché permanents pour faire cha , faut dire qu in éto un 31 décempe ......

mais y a vraimint d' quo s inquiéter, dins ché journeaux , dins les sous titres des reportaches al' télé, dans les titres de bande annonce, mon dieu , que malheur

à l heure d la campane présidentielle, des promesses des candidats à ch' t élection, mi j' sero favorape à c'que la règle du "é" ou "er" ale so inscrite dins ché textes officiels, quite à devoir canger la constitution ....

j' sais bin qu in est asteure plutôt dans eune ére d' communication orale, que l écrit ch'est moins utilisé qu avant ....

j' sais bin que ch'est pas la faute des zinstituteux, eux i suiffent l' programme qu in leur dit d enseigner

mais mais mais ...

mi j' eum' mets al'plache d' ché maites que j a eu in primaire ...

j' les vo là cor devant mi ..

Madame Facon qui nous appreno en maternelle "E A U , "o" de bateau" ...............

Madame Dupin qui nous appreno à bin lire, avec ch' buvard sous la ligne , vous vous souvenez d' cha ? la lecture, du qu ale désigno un éleffe pour lire tout haut ch' texte , et les zautes in suivo sur nos liffes (fallo suiffe, pasque si ale voyo que této dans la lune, ale dijo à chti qui liso d' s interrompe d un coup et ale te demindo d' printe le relais d la lecture , et té t artrouvo babache àch'momint là)

Monsieur Wacheux, li ,j' me souviens d' ces tableaux qui ardéplio, et que d' sur i avo mis eune succession d' mots décortiqués, la fin des mots, qui donnotent l' même son, éto mis in rouche, portail, éventail, soupirail ...

Monsieur Robitaille, qui nous faijo apprinte les poésies de Théophile Gautier ou de Paul Fort ou ch' passé simpe , ch' passé composé et l futur ....

Monsieur Sergent qui nous égrainot au soir, la liste des exercices du bled qui faudro faire pour l' prochain coup

Monsieur Pruvost , qui li nous expliquo, c'que ch'éto l attribut et l épithète

Monsieur Zarzinski qui nous emmeno dans les subjonctifs , les plus que parfait , futur antérieur , enfin tout pour nous imbeter qu in dijo à l époque

mais qu in do dire, qu in matière d orthographe, ch' niveau y a grinmint baissé asteure