Les jardinsdécès de Mado Poquet (1)
par nounours-94 le, 22/01/2017Mado qui sin est allé arjointe Daniel. cha m'a fait tout drôle quand Marie-Claire m'a prévenue.
Chétot des amis de longue date, ej les avos connu quand i z'avotent arpris l' bistrot de leurs pinrints in haut d'ech' boul'vard Basly. dins ch' temps la i s'aplot l' Terminus, parce que chétot l' terminus du car bleu qui vénot du Cercle.
Chétot min quartier général quand j'armontos à Bruay. chez la que j'ai appris à juer ale belote d' comptoir et fait queques guinses.
Mado collectionnot les affiches d' ciné comme ej travaillos pour une boîte de pub quand j'in avos j'i in ramenos, ale étot continte. Al m' demandot: combien ej té dos? j'i disos: j'en peux pas printe vos sous j'ai pas d' poques à min blouson ou alors pour l' faire inrager: donnez me vote juke box qui est dins l' cour à m' disot: t'as vue la vierche? ben souvint ale me payot un verre.
Des anecdotes ou des histoires ej pourros in raconter des mille et des cents. mais ej va m'arrêter la sinan ej va y passe l' journée.
Pour clore l' sujet ej dirai que pour mi ché cor une page de Bruay qui s' tourne et qu'hier soir in arpinsant à tout cha j'em sus dit: on s'a bien amusé et que grâce à eusse j'ai pus faire jeunesse. Ej sus sur que la haut avec Daniel i z'auront granmint d' plaji à arparler de leur bistro.
Et j'em sus dit cha passe vite merte té va bétôt avoir 60 ans..
Ci-joint el photo du bistrot
( 1 photos)
