du créchon au bas nylon
par minloute le, 11/02/2017en moyen d' locomotion, j' véyo aussi passer "créchon" sur sin vélo
"créchon" ou "crécho", chéto c'que j' l intindo crier le long d' la rue Anatole France , avec sin vélo à la main
sul' devant d' sin vélo eune espèce d' grile in fer, du qui avo accroché ché grands sacs d' toile d' jute , tout humites, avec ché bottes d' créchon ou de cresson si vous préférez ...
m' mère ale li in acato toudis, d ailleurs yavo des fos j éto chargé d' faire l' guet, et dés que j l intindo crier j allo appeler m' mère
j' me souviens pu d' sin visache à ch' monsieur, déjà agé , avec sin beret sus' tiete qui nous l' vindo, mais comme m' mère ale me l avo fait armarquer , i avo ché mains toutes gercées au contaque d' humidité des bottes d' crechon...
yavo aussi par momints l' passache du rémouleur, i avo s' meule qui éto montée comme sur eune barouette, et i faijo l' tour des corons pour vire si ché gins zavotent te pas des outils ou des coutiaux à faire affuter .....
un aut' que m'mère ale avo pas ker, chéto un vitrier, parel, i avo eune espèce d' brouette, qui li servo d atelier, et m'mère , am'mote qu ale éto à l origine des légendes urbaines, as' méfiot d' li quand qui passo dins ché rues avec sin gamin avec li
ale dijo que ch' gamin i pouvo aussi n in profiter pour lancer eune paire d' cailloux dins ché vites d' mason, avant l' passache "providentiel" du fameux vitrier ...
mais mi j y croyo pas, pour mi cha devo cor et' eune invention d'em grand mère, superstitieusse comme pas deux ....
après yavo ché baraquins qui passotent à pied, ou plutôt ché femmes d' baraquins qui voulotent nous vinte des wassingues
mais là nous in avo un tchien espécial, eune chienne plutôt d ailleurs, qu ale éto d eune grante gentillesse, mais as' deminder si ché grantes ropes d' ché femmes cha li plaijo pas grinmint, in tout cas, dès qui sonnotent al' porte, et que m'mère ale l introuvo , ch' tchien i arréto pas d aboyer ...
parel , quand qui yavo ché marocains qui passotent avec ché grands tapis sur l épaule, in s intindo pu à l intrée del mason si i venotent buquer al' porte ...
in aparté , avec ch' tchien là, i avo aussi eune drole d' réaction avec ch' facteur
d ordinaire , ale li dijo rin, tout au long de l année, mais alors, ch' jur qui passo pour ché calendriers, ale arreto pas d aboyer
am' mote comme dijot m' mère que l' fait qui barloquo in arrivant al' mason, ouais j allo dire "am'mote" mais chéto telmint évident, que quand qui faijo ch' te tournée là, i s'faijo pas prier pour boire un verre chez ché gins .....
mais arvenons à nos commerces qu in voyo à l époque ......
j' me souviens mais alors j' l a vu qu un coup et chéto rue de denain, on l armonto d ailleurs et in avo croisé avec m' mère "cachaloque"
j auro meme du préciser "cachaloque et piaux d' lapin" , li y avo eune espèce d' tombereau du qui metto tout c' qui récupéro
j a l' souvenir qui avo eune ceinture d' maronne que chéto in fait eune fichelle
j' la pas ravisé long'mint vu que m'mère ale dijo toudis quand que j éto pas sache, qu ale allo m' vinte à cachaloque
in plus ch' jur là j avo pas du et' sache, vu que quand que m'mère ale a vu qui ch' éto ale m a dit qu ' cha quéyo bin , qu ale s'ro débarrassée d' mi ...
j in meno pas larche ...
dins ch'tite du sujet j a mis " au bas nylon"...
yavo sur bruay un monsieur tout pitit, un marchand ambulant, avec eune espéce d' tricycle , i éto assis d' dins , yavo pas d' protection d' toit ...
j a ravisé sur internet, si vous buquez "tricycle la pavane" verrez un viu modèle qui arsempe à c'qu' j' voulo vous dire ...
j' sais pu si pour avincher i ayonno d avant en arriere un volant, ou si chéto l aute modele, du qui avo comme un pédalier à hauteur d' ses mains, pi d' là comme sur un vélo, eune chaine qui éto arliée à ché roues , j' sais pu mes gins
à l arriere d' sin tricycle, ch' pitit monsieur, beret sus' tiete, i soul'vo avec ses pitits dogts boudinés eune espèce d' grant couverque que d' sous, yavo c' qui vindo
c'est à dire, des bas nylon pour ché femmes, des lames d' rasoir, des blaireaux ,des savonettes ,bref , tout c' qui pouvo avoir rapport avec la toilette
bon cha y est j a fait l' tour d' ché carettes ou aut' moyens d' locomotion qu in voyo dins la rue à la fin des années 60 ?
nan , j' viens d in artrouver et cha fera l objet du prochain sujet que j' fera demain matin, bon samedi à tous mes gins
Ch'marchand d'cresson i criot "cressaannn, cressaannn.....", j'l'ai connu aussi, i y a eu aussi une dame toudis avec ch'sac d'cresson sus un vélo.
In s'qui concerne ch'tricycle i in avot pas mal à Bruay à eun' certinne époque, ch'etot l' véhicule des handicapés d'la guerre 14 et comme té dis Minloute fallot ayonner un volant d'avant in arrière ou alors eun' longue chaîne d' vélo qui fallot tourner avec un genre d' pédalier à l'forche ed ses bras, j'ai minme connu quelqu'un qui y attachot un gros tchien pou l'saquer,