du rififi à l impasse Toupy fin
par minloute le, 14/02/2017bon zavez compris que l impasse Toupy à l époque chéto un peu comme un coupe gorche
au coin , yavo eune grante mason, que j a toudis connu freumée, là j va avoir besoin d ' l avis d' Marcel, vu que j in su pu sur mais bon vla l' sentimint que j avo
eune grante mason au coin, en brique, pi après eune espèce d' portal de couleur verte ,portal qui donno sur eune cour du qui yav od' l herbe folle
après chéto chez plouvier et tarvene, enfin i vindotent des artiques ménagers, moulinex et compagnie
et ch' fils y éto handicapé et i léquo souvint l' vitrine d' l intérieur
après chéto ch' magasin d' boissons , eune femme qu ale teno cha , ale porto eune blouse blanque
bon, nous vla chi such' trottoir en face , et yavo un monte , mais un monte, in se s'ro cru au passache du tour de France
tout l' monte i discuto, en attendant l' grand even'mint, Omer ch' boucher ,i éto là, j' in a gardé l' souvenir vu que cha m' faijo bizarre del vire ichi, alors qui auro du et' "à sin poste" ,et non pas à attinte avec ché gins
cha l impécho pas d' entamer la conversation avec ses clientes, tout cha pour faire passer l' temps vu que yallo avoir un ev'nmint extraordinaire, l abattache del mason du coin ....
cha devo ch' faire avec eune grue et eune espéce d' boule in ferale , qui allo v'nir taper su ché murs et faire querre toute l habitation
tout l' monte éto là, ché gendarmes ou ché policiers j' sais pu, mais l' route ale allo et' bouclée, ché gins i pourrotent pu passer l' temps d' la démolition ...
tout l' monte éto concentré, cha allo s' faire non pas dans la mineute, mais dans les chinq , chéto sur
tout l' monte avo ses yux rivés sul' mason et l' grue qui v'no d' printe plache ...
ch' cordon d' sécurité i v'no det' mis en place par les forces de l orte, lorsque soudain ...
lorsque soudain ,j' vo rintrer dins min champ d' vision, "ma tante Marie" , que chéto plutôt ma grand tante Marie, épousse d' Octave, dit "mononc'octaff" , frère de ma grand mère
ma tante Marie, commint vous in parler .... dans s' vie et dans l orte des préférences y avo ses tchiens, pi ses tchiens, pi cor ses tchiens, pi Octaffe, bon si j éto méquant j' diro ses tchiens, ché zapéritifs avec Octaffe ...et pi chéto tout ...
l' reste i l intéresso pas, t avo l impression qu ale vivo dans un aut' monte, comme in diro asteure, ale éto pas toudis connectée ...
chéto l' cas ach' momint là, du que, le plus naturel'mint possipe, sans s' poser d' questions, ma tante Marie, ale passe intre ché gins et ché policiers, comme cha , sans faire d' bruit, sans manifester quo qu'che cho, nan ale éto dins sin monte
et avo qu eune idée en tiete, chéto d' rintrer as' mason en arvenant d' ché courses ..............
et j' el vo passer comme cha d'vant ché policiers, passer d' vant l' mason, et y a pas personne qui a bronché ,chéto comme chi chéto un ovni qui éto passé ....
l' vlà au coin del rue, et là j' sins l' drame arriver, pasque là , mes gins , miraque d' ché miraques, vla ti pas que j' vo , tout au bout de l impasse toupy, mon 'onc octaffe , à pied, en train d' guetter l arrivée d' Marie
mon onc' octaffe, i éto tout pitit ,chéto pas chti qui allo parler l' plus fort, àh nan , i avo été chef comtabe et am' mote i avo gardé le gout pour parler que l' essentiel ...
et quand que j' dis miraque d' ché miraques, pas mononc' octaf , tel voyo rar'mint à pied
quand qui avo des déplach'mints à faire i appelo Narcisse, son ancien chauffeur, comme li à la retraite, et qui l immeno du qui voulo quand qui avo besoin
vlà l' tante Marie qu ale rinte dins l impasse, cabas à la main d' chaque coté, comme pour équilibrer s' fine silhouette
j auro pu dire eune silhouette d' méguerlo mes gins ..
ale avincho, et ale a été surprisse d' vire Octaffe dans la rue face à elle
mi j a suivi ch' drame là , in direque, sans pouvoir intinte c'qui s' dijotent tous les deux , j avo l' version sans l' son et ch in in éto cor plus impressionnant
l' tante Marie qu ale rinte dins l' rue, qu ale vo Octaffe au bout qui li fait des sines...
elle qui s artourne pour vire si yavo pas quéqu un derriere elle, c' qui auro pu et' l explication pourquo octaffe éto au bout del rue à faire des grands gestes
ma tante Marie avec sin visache imperturbape , qu ale savo pas quo pinser, qu ale tourno sur elle même avec ses sacs qu in auro dit un derviche tourneur
et mi qui voyo qu el' grue ale allo commincher à abatte ché murs , chéto l affaire d' secontes asteure
et la tante Marie qu ale allo vers Octaffe qui "crio" , enfin j a mis "crio" entre parenthèses, pasque in pouvo pas dire que mon onc' octaffe i avo eune vo qui porto , cha s'ro plutôt l' contraire ...
j'el voyo faire des gestes d énervemint ,et la tante Marie qui s artourno cor avec sin air ébahi, au mitan d' l impasse toupy
j' les voyo tous les deux d un coté , seuls dans l impasse et l' monte autour d' mi qui n avo d' yeux que pour l' démolition ...
ale est quand meme arrivée , la tante Marie à hauteur d' mononc'octaff qui l a pris par l' bras et la diriger vers leu mason
am' mote que ses explications ale devotent pas et' bin claires, que la tante ale s artourno vers nouzautes au loin ,mais mon onc' octaffe, i a réussi à l' faire rintrer à mason , mais j' su pas sur qu ale avo compris à quo ale avo échappé
et voyez , y a pas fallu longtimps après pour que ché murs i dégringolent au sol , dans un nuache d ' poussières
asteure si vous venez in pélerinache à bruay pour vire les lieux du drame , j va vous donner des renseignemints
d abord si vous ravisez sur gogole maps et buquez impasse toupy bruay ... nan j a cor miu fait j a fait eune capture d écran
en 1 ch'est là qu habito mononqu' octaffe, en 2 ch'est là qui yavo eune grante habitation démolie , en 3 du qui yavo l ateyer de Léon ch' matelassier ...
asteure devant l ancienne habitation, y a un arrêt d' bus, et là j' cro bin que du que chéto l' magasin d artiques ménagers, ch'est là que Omer Ducrocq y avo installé eune boucherie , arprisse après par sin fils Daniel, pi par sin pitit fils
voilà mes gins savez tout du rififi qui a failli s'dérouler à mon d' l impasse Toupy, bruay les berdoules, tout début des années 70
Minloute, si mes souv'nirs sont bons l'maison qui est abattue ch'jour là cha dot ête l'maison dû qu'un jour dins l'nuit (ch'est rigolo d'dire cha) la dame qui était déjà âgée et veuve je crois a entendue son chien crier car le sol de sa cuisine s'était affaissé et le chien s'était retrouvé à la cave, ça s'est passé aux alentours de l'année 1960 (avant ou après)
c'est cette maison qui se trouvait sur la faille de Ruitz, plus tard la maison de mes voisins et celle d'en face ont été abattues aussi car elles aussi se trouvaient dans le prolongement de cette faille et se retrouvaient "tout d'zinque".
Il me semble que j'en avais déjà parlé sur le site.
Si Daniel ou Nadine se souviennent de cette épisode peut être pourront ils mettre un mot.
Bonne journée à tous
( 1 photos)