Les jardinsah l' bon gout d' la levure
par minloute le, 18/05/2017eune tchiote histoire, quequ' lignes, mais un souvenir "tenace" ...
j éto tchiot , m' mère ale préparo un gatio dans l' arriere cuisine, j' me souviens del tape in bo avec sin tour borduré en acier arplié fixé par de tchiots clous
mi j'raviso m' mère y poser ché ustensiles et ch'saladier, sans oublier ch' linche qu ale étindo d' sur, du paquet d' farine et du rouleau à patisserie qu ale metto sul' coté
j éto tchiot et ch' jur là ,j' s' sais pas c' qui m avo pris, m' mère ale avo posé sul' tape un tchiot cupe de levure ménagère
ch'éto bizare ch' truc là, tel' toucho chéto un peu mou, un peu humite aussi et cha dégageo eune odeur j allo dire pas désagréape
enfin cha chéto avant ,pasque j' sais pas c' qui m éto passé par l'tiete, eune fo que m'mère ale éto partie déchinte al' caffe, j avo ouvert ch' paquet et j avo croqué d' dins ...
ah j' l a vite argretté, que mauvais gout dins l' bouque , un coup à tout ardégueuler vite fait dins l' poubelle , au momint que m'mère ale arveno
j' vous dis pas commint que j' m a fait ingueuler ch' coup là, mais l' pire in plus , chéto l' gout amer qui m éto resté un bon momint su mes papiles ...
