Merlimont hors saison 7
par minloute le, 18/06/2017in passe à tape, m'mère ale avo ramené d' Bruay eune boite d' maquereaux pour l intrée
boite d' maquereaux zallez vous moquer, nan pas ché boites d asteure qu in pourro se d'minder si la porution ou l' récauf'mint climatique a pas fait réduire l' tale d' ché pichons .......
vu qu avant l' boite ale faijo pratiqu'mint l' doupe d' tale d' celle d asteure
aute point , in l ouvro avec eune clé espéciale, que toutes ché ménagères avotent dins le p'tit tiroir d' la tape d' cuisine
savez chti qui fait décapsuleur d un coté et qui a eune fente au bout du manche pour y incrinquer l' fameusse languette del boite in fer .......
après m' mère ale avo fait récauffer eune boite d' cassoulet , pas du william saurin mes gins, du cassoulet de la "conserverie des flandres" acatée à la coopé , d' sur l' boite in voyo un vieux coupe qui mingeo ch' cassoulet, habillés à l ancienne, li i arsonno plus à un normand qu à un flamint, mais toute reflexion faite, que che so un normand ou un flamand , in éto bin loin d' la région d origine du cassoulet
m' mère ale nous servo mais comme diro l aute " ale éto pas dins s'n assiette", ale avo pas ker faire des plats comme cha, ouvrer des boites d' plats tout faits, chéto pas dins ses zhabitutes, chéto comme si ale faijo pas del vraie cuisine ..
meme si la cuisine ale avo pas trop ker l' faire et pourtant ale savo la faire
tout in mingeant , in acouto les jeux radiophoniques, su europe numéro 1 comme in dijo à l époque
chéto animé par pierre bellemare , entouré des frères rouland, jacques et jean paul, pi jean marc épinoux
chéto souvint des enigmes à trouver qui leur fallo trouver l' solution, énigmes qui avotent un rapport avec la "ville étape" du que s' trouvo l émission
pour lancer ché publicités, yavo Harold kay, et pi Vonny , celle qui avo eu un éfant avec guy lux ...
vinguette, vlà ti pas que j' fais piplette bin d' zannées après
le repas terminé, min père i allo s ' mette dins sin fauteul, pour étudier sin journal "la croix"
quand que j' dis étudier, chéto plutot un support à qui s indorme et qu in l intinte ronfler duch'mint
pendant ch' temps là m' mère ale faijo l' vaisselle, ale faijo cor eune tronche d' chinq metes, vu que le lévier i éto tout tchiot dins l' chalet, rin à vire avec chti de bruay...
savez in a ses zhabitutes ......
j' vous dijo qu' min père i somnolo, i nous faijo du commandant cousteau, c'est à dire qui faijo des apnées, mais in éto loin du "monde du silence" ...
y a des coups quand que j' juo derriere l' chalet, porte ouverte, in l intindo ronfler dur ...
mais i faijo que somnoler, vu que m'mère ale faijo ch' café après que l' grosse vaisselle a so faite ...
mi pendant ch' temps là , j avo , enfin , pu arprinte possession del barraque à min père ...
là j' pouvo arsortir ché juets d' l année d avant, bon i fallo que j artire ché toiles d araignées, pi savez depuis que j y avo trouvé un coup un crapaud au fond d un carton , j' raviso à deux coups avant d y mette m' main
souvint j' juo un peu au sape derriere le chalet ,ou j artrouvo un pistolet ou un fusil, en plastique bin sur, et là j 'préparo tout cha pour m' sortie d après ...
j' conno l' programme d' l après midi...vers 14 h 30 min père i va dire " qu in y va"
c'est à dire qu in va faire un tour , j' sais qu in s'ra de retour vers 17 heures, vu qui a prévu d ' s attaquer à artirer ché pissenlits qui ont envahi l' pelousse
quand que j' dis qu in va faire un tour, en fait tout y éto réglé comme du papier à musique
in est ichi à pacques, donc y a pas grinmint d' traval à faire au chalet, cha veut dire que ch' t après midi in va faire un tour à la plage, et que d' main in fera eune aut' promenate, plus sérieusse ch' coup là, du ginre merlimont stella aller et retour ......
l' tour en gros , chéto toudis l' meme , in parto vers la plache de merlimont , in passant par ché rues qui s'situotent à droite d' l avenue de la plage, tout cha pour déboucher au bout sur l avenue de l esplanade, faire toute l esplanade...
continuer jusqu au calvaire, à gauche, d' là i fera demi tour pour arvenir par l avenue principale, l avenue de la plage
mais cha mes gins se sera pour un aut' jour ...