Merlimont hors saison 8
par minloute le, 01/07/2017après minger , j a pu arprinte possession del barraque à min père, chéto en fait eune ancienne cabane d' cantonniers des qu'mins d' fer des zouillères que mon mononque avo du racater
chéto tout in bo, ale avo djà eune paire d années quand qui l ont mis in plache au miyeu des années 50, quand qui zont construit le chalet , et chte barraque ale a tenu l' coup cor bin près d' 40 ans, et cor ale a été abattue pour in construire eune aute in plaques d' béton ....
j avo ker y rintrer , chaque année chéto la croix et la banniere, (cha chéto eune expression d' em mère qu ale avo ker imployer) pour l ouvrer, vu que comme tout y éto tout in bo, avec l humidité et ché zembruns , ch' bois du plancher i s' gondolo toudis un peu
fallo donner toudis au départ un bon coup d épaule pour pouvoir rintrer, un bon coup mais pas trop quand meme sinan l' porte ale s ouvro sec , et té pouvo t artrouver l' tiete dins ché casiers
eune fo l' porte ouverte, ale avo tendance , chte carogne, à arvenir , alors pour l' coincher, min père qui gardo tout et jeto rin, avo "récupéré" eune viele champe à air d' vélo, qui avo raccourci in in faijant des nœuds, et qui éto infilée sul' poignée del porte, cha faijo que l' porte ale pouvo pas arvenir s' freumer, et qu in pouvo facil'mint artirer chte champe à air si in voulo arfermer l' porte, savez quand qu in a eu un papa qui a fait toute s' carriere au jour, dins ché ateliers centraux, en étant magasinier, fallo s attinte à tout en matiere d' récupération ...
ch'éto eune tchiote barraque , peinte, cha s'ro un grand mot ,disons que cha faijo un effet cérusé vert (l' peinture d origine) qu in auro bin les peines du monte à obtenir asteure un aussi bio dégradé .....
mais al' teno l' coup , chéto l' principal....
à l intérieur, j' pourro vous zin faire l' détal, in aut' coup, intre ché cartons ché paniers in plastique à bouteles, ché rouleaux d' récupérations d' bande d' roul'mint en prevenance des zouilleres (qu' min père i metto in plache quand que vraimint ch' sape y éto trop mou pour rintrer l' carette dins l' terrain), yavo aussi "min coin" ch'est là qui yavo dans des viux cageots, mes juets d' l année d avant
m' mère ale vous diro que j' éto bin brisaque vu qui n avo pas grinmint qui étotent pas cassés, ou qui minquo pas un bout
mais bon pour merlimont cha faijo l affaire ...
in éto au momint d' pacques, et yavo vraimint pas grinmint d' passaches d' carettes, faut dire qu in saison chéto qu un flux interrompu d'10 heures au matin à 19 h au soir , cha n arreto pas d' passer et d arpasser sur l avenue d' la plage qui éto juste à 20 metes del mason ....
au point que , j' faijo souvint l' chemin entre la barraque et ch' portal, que j' franchisso in sautant comme un bidet d' courses pour vire si yavo pas eune voiture qui arrivo du bout du bout d' l avenue en provenance d' merlimont villache ...
j éto am' mote , cha m' faijo comme un avant gout d' ché grantes vacances, j avo artrouvé un pistolet en plastique d' l année d avant , et l' barraque as' transformo en fort apache, en diligence, en batio su l' mississipi , au gré d'em n imagination ...
quequ'fo j' freumo l' porte, j' gardo min pistolet à la main , et j' faijo pu un bruit, j' raviso par ch' trou d un nœud d' bo qui éto parti, à travers l' porte, et j' risquo un n eule pour vire si j' vo pas passer la silhouette d un indien ,(souvint des zapaches, les pires, faut dire qu in nous les présinto comme cha dins ché flimes d' ouestern)
j acouto sans faire d' bruits, chéto calme , in intindo ché coulons qui étotent perchés su ché toitures autour , pi d un coup , retour à la réalité , m' mère ale m appelo , in allo partir pour faire ch' fameux tour à la plage