Merlimont hors saison 10

y avo d autes raisons aussi pourquo qu in allo toudis à droite de la plage, ch'est qu à gauche en direction d' Berck, yavo un endro du qui yavo comme un ruisseau qui s' jetto dans la mer, et pou mes parints ,c' qui coulo par là chéto pas de l io d' source tous les jours .....

pi chéto plus commote pour arjointe la plage, sans avoir à traverser l avenue principale vu qu en été chéto l avenue que t évito à traverser devant chez nous vu l' traffic qui yavo

cha y est on s engage dans l avenue de flandre, su la droite yavo cor eune seule mason cor intourée à l époque d' sape arcouvert d oyats et d' plantes piquantes

un peu plus loin sul' meme coté yavo ché deux courts de tennis , j' parle des anciens pas d' ceux qu in a construit après du coté du mini golf , qui existo pas cor à l époque bin sur

l été ichi, ch' éto l animation

yavo toudis comme un attroup'mint, yavo plein d' monte qui éto soit assis su l herpe , d autes ravisotent les matchs en restant assis su leu vélos

y a eune anecdote qu ale m arvient

yavo des gins qui juotent pas trop mal pi d autes que ch éto pas des espécialistes et comme l' grillache qui intouro les courts i éto pas si haut qu' cha ou alors que ché gins i linçottent l' balle trop haut , et vu que derriere chéto pas facile d acces, avec ché buissons plein d' piquants , l' soir , avec min cousin, in allo cacher après ché balles, in ayant armis pour l occasion eune longue marrone .....


là, au momint d' pacques, ch' coin là i arsemblo plutôt à eune ville fantome

minquo pu que les paquets d' herbes seques qui roulerotent dins la rue , et in se sero cru dins un villache abandonné du coté du rio grande ......

d' l herpe y en avo quand meme, et cha m' surpreno d' in vire pousser alors que l' sol chéto del terre battue d couleur rouche

les perchoirs pour ché zarbites avotent beson " d un bon coup d' peinture" , in voyo des trainées d' rouille su la peinture blanche

ch éto d ailleurs le lot de beaucoup de villas, simplemint occupées durant l été et un peu en dehors d' la saison, laissées tout l' reste d' l année à subir les attaques d' l air marin carqué en sel

ch' t air marin i s attaquo à toutes ché structures

combien d' coups tout au long del promenate, min père ou m'mère i diront que chte mason chi ale auro besoin d un bon coup d' pinceau vu que l' peinture as' craquelo grinmint ...

plus loin cha sera des gonds de volets qui seront aussi victimes de grantes coulures de rouille ....

là , un volet mal freumé à l étage qui baille , faut dire que chéto eune fichelle qui l arteno au départ , "racommodache d' bricoleux" qui dijo min père

ailleurs che sera ché portails qui faudro au moins arpeinte, au miu busier à un grand ponçache sans oublier d passer un coup coup au préalape d' peinture au minium..

savez ch'te peinture conte la rouille d' couleur oranche ........

cha chéto des réflexions à min père , grand bricoleux devant l éternel ...

tout au long d' not' promenate, in va passer d'vant ché villas, et y faudro faire un tchiot rappel d' l évolution des constructions à merlimont

autant avant la deuxieme guerre mondiale , j' l' a djà dit chéto principal'mint des hôtels , des grantes villas, ou des villas qui étotent en location

après la guerre, j' dirai eune fo les années 40 finies que ché gins i zont pu arcommincher à rever, pi à pouvoir partir en vagances, ché gins i zont comminché à construire ichi leur mason d' vagances

et faut dire que cha a été un peu " l anarchie" mais ch' est c' qui fait le charme de chte station

en passant d' vant ché villas, in voyo d' tout...

in pourro meme faire un inventaire à la Prévert

des grantes à 1 ou 2 étages, mais aussi des pitites de plain pied ......

des qui étotent au bord del route, d autes en retrait ......

des qui avotent été construites par des professionnels, d autes par ché gins eux memes .......

des toitures austères in tole fibro...

des toitures plus classiques en tuile mécanique...

cha allo aussi bin d' la panne flamante , à la tuile de Libercourt en passant par celle d' phalempin, ou cor d' la tuile woesterlandt...

la plupart d' ché tuiles ale zétotent d' couleur rouge, ou flammée, mais in trouvo aussi des tuiles vernies

sur certaines villas in s éto "amusé" à faire des dessins avec ché tuiles en in mettant d' couleurs différentes

in trouvo aussi des toitures en ardoise, d' couleur noire pour les "vraies ardoises" et d' couleur grisse pour celles en fibro

villa à toiture à eune pente, la plus "économique" , construites en parpaings , arcouvertes au miu d un crépi ou peintes directemint

villa à deux pentes, mais aussi de nombreuses villas avec des brisis de tuile , savez des pans d' toitures qui artombotent droits, (comme in trouve souvint en flandre francaise)

in trouvo aussi quequ' masons à toiture à la Mansart

chéto grinmint hétéroclite, mais cha choquo pas, in voyo qui yavo tous les styles , et en fin d' compte ché cha qui in faijo le charme ....