souvenirs d' rintrées

si j' devo comme cha vous raconter des souvenirs d' rintrées scolaires, ch' premier qui m' vient à l esprit comme cha, j' éto dans la pieche d' devant ,am' mote j allo y querre min mantiau avant d' partir à l école ....

j a été attiré à raviser par l' farniete del pieche qui donno su la rue Anatole France, suite aux braimints d un tchiot qui voulo pas aller à l école

mi j éto commint qu in pourro dire, interdit , vla ch'est cb' bon mot, j éto "interdit"......

such' trottoir d en face, chéto eune lutte, entre l' mère qui meno fermement ch' gosse vers l école, et ch' tchiot qui brayo , mais surtout qui tiro dans l aute sens comme si i voulo ardéchinte la cote vers les quat' chemins ....

j avo peur que ch' gamin i lache la main des 'mère, et que d un coup i s' détache et qui traverse la rue du qui yavo grinmint d'trafic .....

chéto à min tour aussi d y aller, j' prenno sur mi d' pas braire in partant avec m'mère, comme un condamné qui va printe l' chemin du gibet ......

eune fo avoir traversés la rue Anatole France, entre ch' flot d' carettes, yavo pu qu à tourner à droite et à déchinte l' rue qui meno vers la rue raymond deruy

cha donno l impression d eune vraie fourmiyere, ché éfants partotent in direction d' l école in tenant fermemint la main d leu mère ...

al' reflexion, chéto plutôt l' contraire, chéto plutôt ché mamans qui tenotent fermement la main d' leu zéfants

in sine d' la tiete d eune mère à eune aut' qui parto aussi conduire ché zinfants vers l école loubet

eune vraie fourmiyere, cha sorto d' la rue d' paris, d' la rue d' chatellerault, n a d autes qui venotent d' la rue d isberques, d autes qui armontotent d' la rue raymond deruy, tout cha pour s' diriger vers la rue de denain

fallo presque printe sin ticket pour aller vers la rue de denain, chéto eune vraie procession.............

juste avant d' tourner , au coin d' la rue de denain, ch' freumo les ziux un court instant, en espérant, mais est ce que j y croyo vraimint, j espero un miraque

un miraque du genre que ché toitures ale zautotent brulé, que pour eune raison ou eune aut', cha sero pas possipe d' rintrer dans la cour de classe

malheureus'mint, en rouvrant les neules, ché toitures étotent cor bin in plache, et meme si in voyo de loin qui yavo comme un attroup'mint devant ché portals, meme si yavo d' l animation, in pouvo pas déceler un réel danger potentiel qui m impechero d' rintrer dans la cour d' récréation , et de là, faire la vraie rentrée en classes

plus qu on approcho, plus m'mère ale voulo paraite joyeusse, am' mote qu ale devo vire que mi chéto plutôt l' contraire, plus j approcho, plus j devo saquer min nez .....

cha y est , pu que quequ' metes, in ralentisso vu qui yavo grinmint d' parints , presque que des mamans d ailleurs, et que intre elles cha babello sec , tandis que nous ché éfants, in raviso plutôt nos ortiaux que d' raviser ch' grand portail vert qui nous séparo d' la cour de récréation ...

el plus grand souvenir que je garde del rintrée à l'école Loubet quand j'avos 6-7 ans chéto ech soldat allemand avec sin fusil à l'intrée ed l'école, j'me sus toujours edmindé quequi faiso la.