Merlimont hors saison 17

j auro pu vous raconter met' par met' du poste d' nage jusqu au chalet in parlant d' ché masons qui bordottent l avenue de la plage

quand que j' arsouviens d'l avenue de la plage, ché à la fois toutes ché masons de style différent accolées, et durant la saison, ch' monde qui y avo su ché trottoirs, et toutes ché odeurs d' cuisson qui vous zarmontotent dins les narines tout au long de chte grante rue ....

in va arvenir jusqu au chalet , mais ch' coup chi , sans lever ses ziux au ciel, et j' diro aussi par habitute, sans meme trop raviser c'qui a à terre ...

faut dire que si tout l' monte a pu construire un peu c'qui voulo comme style d' masons, jusqu' à y a eune tchiote vingtaine d années, ché trottoirs chéto un peu à la va comme j' te pousse ...

quand que ché gins ont construit leu mason sur l avenue principale, la plupart d intre eux ont fait aussi leu trottoir

i zont fait leu trottoir chacun as'motte, i n ' a que chéto des dalles en béton quadrillées, juste après té trouvo des grantes dalles d' béton, pi après des carreaux en terre cuite qui arsemblotent à des tomettes, là y un aute, avo coulé du béton frais et dessiné des formes pour donner l effet d un opus ...

quand qui zont du faire l' devant d' leu mason, ché gins, et j' les comprinds à l époque, i zont fait cha sans pinser au futur

sans pinser qu avec des fondations bin pas trop profontes, avec ch' sous sol en sape, cha allo bouger...

sans pinser aussi qui yallo y avoir un sacré passache durant l été, quand la station balnéaire ale auro vraimint l' vent en poupe ...

alors , avec l'temps, cha arrivo qu autour un caniveau , ché dalles ale se so affaissées ....

cha arrivo aussi que l' béton i s'finte complet'mint et qui s effrite ...

cha arrivo que ché tomettes in terre cuite, soumises à l effet combiné du vint, du sel, et d' la puie , i s effritent grinmint ....

la municipalité ale a , j a trouvé l' mot, ale a compensé par indrot, quand que j' dis compensé, ch'est qu à des zindrots ale a avo mis des couches d' bitumes par chi, coulé du béton par là ...

mais comme j' dijo precedamint, comme ché fondations chéto pas du bien solite, y a d zindrots que ch' bitume ou ch' béto ou pouvo s affaisser aussi ...

sans compter aussi que lors des constructions des ilots, y pouvo y avoir d' sacrées différences d hauteur d' trottoirs quand qu in devo traverser

alors mes gins ,quand qu in voulo arvenir par l avenue de la plage en plein été , fallo connaite sin trottoirj allo dire , au bout d' ses zortiaux par cœur .......

savez l été, circuler dans l avenue de la plage vers 11h midi , fallo pratiqu'mint printe sin ticket ...

entre ché gins qui armontotent d' la mer...

ceux qui faijotent la queue d'vant ché étals d' fruits su ché trottoirs...

ceux qui étotent assis su ché terrasses devant ché bistrots ....

ceux qui voulotent aller à la mer ......

sans compter ché étalaches d' juets d' vant ché magasins comme au dé d argent ....

cha faijo qui yavo souvint des bouchons , in s' trouvo selon l espression "cul à cul" , cha arrivo aussi d ailleurs, avec plus ou moins d' chance , d' s artouver derriere chti d eune jeune garnoule, ou hélas plus souvint derriere chti d eune viele matronne ....

chéto pas l' tout d' es dire que si in avincho comme des saurets chéto pas dangereux, bin si, pasque un souvenir, devant un home d infants qui s appelo "les marmousets" yavo eune chausse trappe ...

yavo un cang'mint d hauteur d' trottoirs d un coup, oh pas très élevé, mais combien qui n a qui ont queu à terre, quite à s affaler sur ché gins devant eux ...

j' connaisso ché trottoirs par cœur, un trou dans l' bitume par ichi, eune grante marche d' trottoir là , au coin d' la villa "sans gène" , un caniveau branlant à tel endroit...

en fait cha faijo un peu parcours du combattant tout cha, et cor fallo s' méfier, quand qui yavo grinmint d' monte à pas s'printe un coup d' pied d' parasol ou de siege pliape ....

j avo ker cha , j avo ker i passer quand qui yavo pas trop trop d' monte, j avo l impression d' faire du slalom, passer intre ché gins, les froler un peu comme i faijo jean noel augert dans les années 70...

froler ché gins, éviter ché trous et ché pieges du trottoir comme autant d obstaques à ma progression ...

pi la municipalité a décidé d' arvoir tout cha, d'es donner un coup d' jeune, d' virer tout cha , et d' mette à la plache du pavage en béton

bel ouvrage ch'est sur , in plus chéto des pavés fabriqués du coté de boulone , par les établissements Cantard ...

ch est sur qu asteure cha fait plus bio, plus prope, j allo dire uniformisé, et savez quand que ch'est uniformisé, cha enleffe grinmint d' charme , d' poésie trouvez pas ?