que j auro ker avoir eune chiffernée

j' rappelle pour ceusses qui aurotent pas in tiete le contenu des 19201 histoires publiées sul' site que "chifferné" cha vient d un mot français

cha vient du mot "enchifrené" qui veut dire "avoir le nez embarassé par un rhume" , mi j' diro plutôt qu' min nez i guilo ... ou qui éto rimpli d' mouquilles ....

mais l important ch'est que j arsinto du frod sur mi, j' éto pas dins m' n assiete, j' tronno sec ...


souvenir d un soir du que m' mère ale avo mis s' main sur min front , cha chéto un bon souvenir ...

vu l' résultat, ale allo querre dins le haut d eune des grantes portes d' placard du salon, l' fameusse boite à médicamints

que d'dins yavo mes deux ennemis jurés, l' premier , l huile de foie de morue, mais cha sero pas pour aujour hui ...

l aute, chéto ch' thermomette qui éto dins sin étui, et que j allo y avoir droit, là chéto pas un souvenir imperissape

in allo vire demain au matin si cha allo miu, si fallo faire venir ch' médecin...

eh ouais chéto eune expédition tout cha, in avo pas ch' téléphone al' mason, et si in éto malate, fallo qu' min père i déchinte tot au matin au dispensaire, pour donner ch' carnet et pour que ch' médecin des mines i puisse passer ...

là mes gins fallo pas et' pressé vu qui pouvo passer tot , avant ché visites, ou plus général'mint après , en début d après midi ...au miu

in in éto pas cor là, m' mère ale allo querre dins l' boite, un "aspro" ouais, le vrai aspro, savez ch' medicamint qui étotent par deux dins un emballache rose

à ch' t époque là in juro que par l aspro, alors comme que j éto tchiot, et que l aspro chéto pour min père (j' dis cha pasque j a que le très rare souvenir que m' mère ale in prenno) m' mère ale in prenno , qu' ale coupo in deux en l' coichant dins ses dogts

ale le metto alors dans un verre , après ale prenno eune tchiote cuillère pour l écraser , après ale rajoutto du chuque pour que j' puisse l' boire

savez ch éto l époque que si ché médicamints , plus i zétotent pas bons , miu qui devotent et' efficaces ....

j' el buvo ch' verre, mais bin sur i resto toudis au fond eune bonne couche d' médicamints, qu in rajoutto d' l eau pour faire passer sin gout d' carton ou d' pate à papier ...

après , chéto pour mi l' momint l' plus agréape, chti qu in voudro qui a que li, chti que vous vous souvenez avec mélancolie bin d' zannées plus tard, ch est quand que vot' maman ale vous metto du vicks su la poitrine ...

vieux souvenir mais bon souvenir chtilale ...