tampons scolaires

un des souvenirs du CP école Loubet , école des filles, classe de Madame Facon et Madame Froment

batimint d' droite , rez de chaussée, à droite

ché tampons scolaires ......

distribution par Madame Froment, par tape in s' précipito sur ché tampons pour vire quo que chéto comme motif qu in allo tamponner ....

distribution ensuite des boites d encre du qu in devra bin y mette ch' tampon pour ensuite bin l appliquer sur eune feule de papier

pi après in prenno ché crayons de coloriache et in devo les coloriser


facile à dire tout cha, j in a pas des grands souvenirs ou plutôt des souvenirs heureux

faut dire que j a toudis eu 2 mains gauches, et l' travail manuel et mi cha faijo au moins quate ...

eune fo ché tampons distribués, fallo comme j a dit, encrer l' tampon

cha paraisso facile, mais fallo faire attintion d' pas y mette ché dogts aussi, mi j y arrivo régulier'mint ..

mais bon, in va dire que cha a été .... ensuite fallo bin appliquer ch' tampon ...

y a des coups j appuyo pas assez, alors quo que j' faijo, bin j' armetto ch' tampon, mais comme chéto pas armis au même indrot exact, cha faijo plutôt quéquosse d' trouble , comme si in avo l'bleusse vue d un coup ....


t appuie pas assez minloute, qu ale dijo l' maitresse, l' coup après j y metto toutes mes forches, même que ch' tampon i dérapo su'l tape et que l'résultat i éto pas terripe ...

allez in va dire que cha a été ....voyez j' su optimiste

ch est là qu in commincho l' coloriache, mon diu, combien d' crayons d' couleur que j a cassé ché mines, t es un brisaque minloute qu ale dijo m' mère à la maison, cha s' confirmo in classe

combien d' coups que j' me levo par aller ach' bureau d' la maitresse , du que au coin del tape éto fixé ch' taille crayon

mon diu que plaiji d' tourner la manivelle et d' vire les copeaux du crayon dechinte in spirales dans l' bac transparent situé in d'sous ...

même que cha plaijo tant que quand que j artiro l' crayon, j' l' avo tel'mint taillé que l' mine ale teno à peine, et que eune fo à peine artourné am' plache , au premier coup que j' donno , paf l' mine al' casso

cha arrivo tel'mint souvient que la maitresse al' m avo demindé si jel' faijo exprès

bon allez in va dire que jusque là cha a été .....

après fallo bin faire sin coloriache et que cha dépasse pas des traits ....

ach' momint là , in auro pu dire que j éto "généreux" et que j avo peur du vide , que cha dépasso toudis un peu

pas d' patience minloute, pas d' patience ...

bon allez in va dire que j a réussi à franchir miraculeus'mint toutes ché étapes là...

j a un facheux souvenir qui m éto arvenu ch'est que eune fos l' dessin fini, fallo printe eune paire d' ciseaux à bouron , et découper tout autour

alors pour vous dire que cha m intéresso pas vraimint, j' croyo que des ciseaux à bouron cha existo

m a fallu un momint et eune explication d' em mère pour que j' comprenne qu in voulo parler de ciseaux à "bouts ronds"

mauvais souvenir d un papillon que j avo plus ou moins bien colorié, j' diro plutot bin, pasque l' maitresse ale avo dit que chéto pas graffe si l' coloriache i dépasso pasque in allo découper tout cha

mon diu, j' me souviens cor d' l air ahuri et l' rouche qui m avo monté aux joues quand que j avo ravisé min découpache qui devo respecter les contours

commint vous dire comme si , en arprennant le titre d un jeu "pierre ciseaux" j avo essayé d' découper min dessin avec un silex

j éto vraimint pas doué, et j' do dire qu avec le temps, même si j' m a un peu amélioré , j' su pas un grand fan du bricolache ...