cor heureux qu in avo du sape
par minloute le, 12/11/2017cor heureux qu in avo du sape à Merlimont, j avo pas ker porter savez ché sandalettes en plastique qu in vo souvint
mon diu que ch éto laid, j avo du in porter quand qu in avo été à la napoule en vagances , et j in avo pas eu un bon souvenir
cor heureux pour mi, quand que je les porto et que j' marcho un peu avec, j avo facil'mint d' z' ampoules ou des tchiotes blessures dues au frot'mint et chéto pas top quand qu in éto à merlimont ,avec ch' sape et le sel d' la mer ...
sans compter qu in plus ,ché plaies chéto la porte ouverte à tous ché micropes, micropes qui étotent craints et combattus par m' mère , afin d éviter toute infection
et meme si j avo pas été blessé aux zortiaux , j avo eune arme redoutape, eune arme infaillipe ..
quand que j' metto cha, ch éto pas la peine en fin d' journée d aller acater du vieux lille ou du maroilles, j in produiso tout au moins l odeur à chaque coup .....
ouais j a évité d' porter cha, faut dire que donno un sacré look, et chéto pas réservé qu aux zéfants, ché zadultes i zin portotent aussi
l' pire chéto sandelles plastiques avec cauchettes au pied, alors là, chéto ch' pompon
cor que , meme sans ché cauchettes, avec aux zortiaux des sandalettes plastiques, un short ou un maillot d' bain en polyester, un tricot d' peau pi un bob sul' tiete , cha donno eune touche exotique à ché vagances
par conte j' me souviens d un coup qu in avo été s' promener à wimereux, su la droite , du coté des falaisses, inter ché rochers à aller vire ché zétoiles de mer, et pi ché moules, j auro bin aimé in avoir eune paire que d' querre comme j avo fait, dins un trou d io, entre deux rochers glissant.....
( 2 photos)