arrivée d' la télé et demandez le programme 3

ch'est là que "demander le programme" qui est din ch' tite d' l histoire , que cha devient important

demandez le programme .... j' devro djà commincher par deux chosses

même en busiant in pourro même dire trois chosses

d'abord à l époque, yavo pas toudis des programmes al' télé, yavo des coupures, souvint après 15h30, et cha arprenno pas avant 18h45

vous m' direz , et al' réflexion chéto logique, quo qu ale auro pu faire eune garnoule à raviser l' télé entre 15h30 et 18h45 quand qu in sait qu ale devo s'occuper d' es' mason, aller querre ché jones à l'école, s'occuper d' ché devoirs et commincher à faire à minger ...

parel au soir, après ch' film, les programmes s'arrêtotent vers 22h30 et ch'est pas si viux qu' cha que les programmes ont comminché à et' diffusés in continu

pi yavo eune aut' raison importante à l époque , ch'est qu ale mason in raviso pas l' télé en mingeant , sacrilège auro dit min père ...

aut' cosse aussi , y éto pas question d' laisser alleumer l' télé si ché programmes i zétotent pas intéressants, chéto pas comme asteure que l' télé ale reste souvint alleumé, presque en sourdine, in fond sonore ...

nan, cha couto alors in alleumo et in éteigno la télé selon les directiffes d' min père

pendant un bon momint, ch' programme télé, chéto plus que succinct...

min père i suivo cha avec le journal la croix du nord, chéto en page centrale , j' sais pas quel jur d' la semaine et ch éto commint qu in pourro dire plus que spartiate

chéto écrit à la suite, l' heure d' début et l heure d' fin du film ou des variétés, fin des programmes, etc

sans qui a plus d explications, ou de develop'mint, chéto vraimint le service minimum ...

nous in habito dinch' Pas de Calais et d' temps en temps in allo , ou plutot min père nous traino, m'mère et mi à mon de "tantes" qui avo en région parisienne

j' a écrit "tantes" ch est plus compliqué qu' cha vu que ch eto de lits différents, que m' n arrière grand mère ale s éto mariée 3 coups et que si j' devo commincher à vous expliquer cha in y sero cor d' main matin

donc in va réseumer, in allo à mon des tantes .... j' va pas m etende sul'sujet, yauro d'quo écrire et décrire jusqu à la Noël au moins, alors in va réseumer cha briev'mint

i zétotent arrivées en région parisienne, en venant d' Bruay, au début des années 20, ale zétotent 2, 2 veuves, d un coté plus qu arriéré , t avo l impression en arrivant chez elles que l' temps i s éto arrété en 1930 1940

mais d un aut' coté, ale zétotent in avanche sur nouzautes, pasqu ales zavotent acaté eune télévision in couleur dés que cha a été possipe

djà cha chéto pour mi un sacré cang'mint, et yavo aut' cosse qui m étonno grinmint et que je dévoro , ch éto télé 7 jours

alors là télé 7 jours chéto le programme télé vraimint en avance sur son temps

sur qu in suivo aussi les programmes télé dans femmes d aujourd hui ou le petit écho de la mode, mais télé 7 jours chéto l' premier magazine que sur la télé

quand qu in allo chez elles, fallo bin que j' passe l' temps, alors j' liso cha de long en larche et en travers

tout y éto, des reportaches sur les programmes télé, pi surtout des résumés qui expliquotent le contenu des films présentés, mais aussi le détal par exempe des invités des émissions de variétés de Guy Lux

sans parler des mots croisés et des jeux , in peut dire que télé 7 jours chéto LE magazine télé

faut dire aussi que comme yavo d' plus en plus d' monte qui avo la télé , yavo aussi eune demante des gins pour in savoir plus sur la télé

chaque semaine sul' première pache , eune vedette différente, quand que j' parle d' vedette, cha pouvo et' la guiffe d un acteur d' feuilleton américain, type Mannix ou l homme de fer, et quand qu in voulo faire bien franchouillard , in avo dro souvint al' guiffe d eune spéakrine comme denise fabre par exempe ...

par la suite ,la concurrence s'est developpée, mais en y ravisant bin ,i zavotent pas grinmint fait évoluer le contenu du magazine télévisé, vu que télé 7 jours avo vraimint bien fait les chosses dès le départ

révolution un coup al' mason en arvenant d'la région parisienne, mes parints avotent acaté télé 7 jours et durant quequ'temps ch est devenu not' magazine télévisé

asteure avec le développement de l internet, ché magazines là tout comme les journeaux, in version papier, i souffrent du cang'mint d habitute d' chez gins

depuis bin d' zannées, la télé in couleur ch est devenu la norme

avoir 100 chaines d' télé disponipes aujourd hui , cha n a rin d original, faut dire aussi que même avec 100 chaines y a des momints té sais pas quo choisir, non pas pasque y a trop d' chosses intéressantes à vire, ch'est plutôt la platitute des programmes qui fait cha ....

j a lu dernier'mint qui yavo eune baisse sensipe d'la vente des postes d' télé, que ché gins i sont plus souvint sur leur ordinateur que d' vant la télé

ch'est le progrès mes gins ch'est le progrès