Charlotte dins l' cuisine
par minloute le, 24/11/2017nan mes gins, j' va pas vous arsortir du capiau eune "tante Charlotte", celle dont l' canchon qu ale dit qu ale a des belles totottes ...
nan, Charlotte, jusqu à hier j' savo pas que chéto l' nom du modèle de robot ménager qu ale utiliso m' mère à la maison
moulinex i s' ato pas trompé comme slogan, " eune petite cuisine complète " ........
alors savez ,j' dis cha aux plus jones, quand que ché zappareils ménagers i zont invahis ché cuisines, ché ingénieurs i zont surtout pinsé au gain de temps et à faciliter l' traval d' ménagère ...
le facteur bruit comme diro l aute chéto pas la priorité ...
quand que j' vo sul' photo, aussi bin ch' batteur à zeufs, le "mixer baby " comme i dissent ou ch' fameux robot Charlotte, j m arsouviens tout d' suite l' boucan que cha faijo ..
au matin , al' mason j avo pas b'soin de rével, j' savo quand que m'mère ale allo s' mette in bas du couloir et pi crier " minloute ch' est l heure" ....
j' éto pas devin, i m' suffiso d intinte m' mère passer ché zoranches dans ch' fameux robot, et comme cha faijo un boucan d enfer , meme si té dormo sur tes deux zoreles, té pouvo pas n' pas savoir que cha allo et' l heure d' es lever ...
robot ménager, rin que l' mot robot cha faijo réver ,mais fallo s in méfier de ch' t animal, d ailleurs m' mère ale m avo bin mi en garte d' pas i trouver ,et meme m' connaissant simplemint d' m in approcher
chéto eune fameuse pieche, oh pas si imposant qu' cha, mais d un poids mes gins, que j' voyo que m' mère ale rigolo pas quand qu ale l arsorto du bas du buffet pour l installer sul' tape del cuisine pour presser ché zoranches .....
un sacré poids, mais aussi comme in diro asteure , cha avo un sacré dizaygne ...
l arriere du robot , cha arsemblo vraimint au coffe arriere d eune coccinelle, pas l' insecte, mais l' carette
mais aussi à l époque , cha faijo pinser à un véhicule d' l espace ....
ch' robot là, j' l a bin connu, savez durant ché vacances scolaires,quand que j éto pitit , j' resto souvint à juer avec mes soldats sul' tape d' la cuisine
alors savez les montaches et démontaches d' l apparel, comme à l armée i vous zapprenotent à démonter et à armonter un fusil avec un bandeau sur les yeux,j' cro bin que j auro pu l' faire aussi avec ch' fameux robot
à force d' raviser m' mère s in servir, au coin del tape, j' savo tout
ouais j' m' metto m' tiete juste au niveau d' la tape comme cha ch' robot i m' paraisso cor plus impressionnant
j' suivo m' mère qui cangeo les différentes rapes circulaires qu ale devo intiquer dans l' tige creusse du moteur pour qu ale so intrainées ...
y en avo d' différentes sortes, mi j' raviso leur dessin, la forme différentes d' ché trous que justemint ch ' est cha qui faijo l' miraque final
ouais pasque mes gins, j' trouvo cha étonnant ,j' diro meme magique, d' vire m' mère couper des carottes in grosses rondelles, alleumer l apparel, mette insuite ché morciaux dins l appareil , printe insuite ch' bouchon incurvé qu ale poso par dessus, et là ....
j el voyo appuyer bin fort, tout cha au miyeu du bruit d'ech' robot, juste après j' armetto au niveau del tappe, pour vire sortir so le gruyére , asteure rapé, qui sorto en spirales, so les carottes, qui sortotent en toutes tchiotes brindiles ......
chéto souvint des carottes ou tout au moins ch'est elles , à forche d' passer dans la machine, qu ale zavotent laissé sul' bouton poussoir , du jus , qui à la fin, et meme si m'mère vous pouvez et' sur qu ale le lavo eune fo tout terminé, bin ch' bouton poussoir i avo d ancré eune couleur orangée
j a surtout le souvenir , bon souvint fallo que j insiste, mais chéto souvint mi qui avo l honneur d' finir d' mette ché carottes dins l apparel, bon m' mère ale avo bin arreté ch' moteur , ch' est elle qu ale redemarro l' machine ...
j' me souviens chéto un tout pitit bouton rouche, ou plutot un tout tchiot curseur rouche
et j éto pas peu fier d' vire sortir les aliments in bas, dins l' assiette, asteures hachés, découpés, ou in rondelles ...
bon j' do vous avouer que l' fait d' pouvoir s approcher del machine et d'el faire marcher chéto pas seul'mint pour l' faire mi meme ...
nan , savez ,j éto un peu comme ché vautours savez, j attindo souvint que m' mère ale me donne un tchiot peu de c' qu ale avo haché ...
j' vous raconte pas ch' gruyère tout juste rapé, ou cor miu, savez quand qui resto du boeuf du bouillon et qu ale allo l' passer dins l' machine ...
et d' pouvoir in minger un tchiot peu , comme cha , frod, mon diu que délice ....
( 1 photos)