al' nouvelle année
par minloute le, 31/12/2017j' me souviens d' ché viux quand qui venotent al' mason, et qu intre eux i s' dijotent "eune bonne année" pi après i insistotent sur "et eune bonne santé" ..
quand qu in est tchiot, in pinse pas à cha, nouzautes, in avo l avenir devant nous, la bonne santé, in y pinso pas , chéto tel'mint évident pour nouzautes
pi pour mi mononc'octaffe , ma tante marie , l' cousine à min père clara, i zavotent dépassé le cap des 70 ans, pour nous chéto des vieux, 70 ans , ch'éto à des années leumieres d'nos espérances et d' nos souhaits d' gamin ....
pi ché zannées ale passent, tout duch'mint , oh in a cor l' temps mais tout duch' mint in est obligé d' es dire , allez j' va dire eune belle formule " qu in est plus proche d eux asteure, que du temps qu in éto en culottes courtes"
et quand que j' m arsouviens d' mon onc'octaffe qui imbrasso avec ferveur Clara l' cousine à min père, sous l eule acérée d' es ' femme, la tante marie, qui s imbrassotent bin fort et qui s arculotent pour s' dire bin fort "et eune bonne santé", in est obligé des ' dire que la santé, cha devient aussi pour nouzautes la principale chosse qu in va d'minder pour nous et pour ceux qui nous sont chers pour l année qui arriffe