épluchage d' la Voix du Nord 2
par minloute le, 13/05/2018 après cha min père i "vaquo à ses occupations", cha voulo dire d' abord s' laver, et pouvo et' sur que chéto pas eune toilette d' cat qui faijo ...
d ailleurs mi j' attindo avec impatience qui a fini, pour printe s' plache ..
enfin quand que j' dis "qui a fini" , nan après i fallo qui s'rase, et cha prenno presque autant d' temps que s' toilette complète .....
ch' journal, i allo l arprinte en fin d' matinée, mais i jetto vraimint qu un eule , à moins qui a un artique exceptionnel ....
nan, pasque intertemps , ch' facteur i éto passé et i li avo amené sin jurnal, "La Croix" , i lijo cha min père, et là chéto d' façon sérieusse...
d ailleurs , pour lire "La Croix", fallo pas vouloir y cacher d' zhistoires drôles ..... mais comme i dijo "j a ker leur point d' vue , ché toudis réfléchi et décalé".....
mi la Voix du Nord, j'a comminché, au fil du temps, à l éplucher aussi ....
ah , j' raviso pas les mêmes rubriques qu' min père ...
savez un jone au début des années 70, pour suive le championnat d' France d' football, té suivo cha sur la page des sports ........
avec souvint eune grante partie qui éto consacrée à Lille et à Valenciennes, avec des performances plus ou moins poussives .....
pi y a eu au fil d' la décennie la montée in forche du RC Lens ......
avec le 2 novembre 1977, la victoire phénoménale contre la lazzio, 6 à zéro , que cha avo même fait la une du journal ..
mais j' m imballe .....
nan , j' avo ker raviser les bandes dessinées qui yavo sous les programmes de télévision
tout particulièr'mint , celle du Professeur Nimbus , ch' personnache qui éto tout chauve, avec un seul caveu sus' tiete, in forme d' point d interrogation ......
aut' cosse que j avo vraimint ker à suiffe , chéto la rubrique patoisante "en acoutant Oscar" , mon diu que j avo ker la lire et la relire .......
plus tard j' me su attaqué aussi à ché mots croisés du week end, eune grande grille , qui m' faijo souvint bin l' week end pour in trouver la majorité
la Voix du Nord.. not' journal, avec à partir d' novempe, su la droite de chaque une, eune rubrique pour le Noël des déshérités
cha m avo fait busier chte rubrique là, d'comprinte qui yavo d" zinfants qui avotent bin moins d' chances qu' nouzautes , mais qui gardotent quand même, tout du moins l' temps d' la photo, un grand sourire
mais yavo eune aut' périote que j avo cor plus ker, chéto la périote des grantes vacances, savez quand que j éto à Merlimont, et que j allo querre chaque jur ch' journal pour m' grand mère
eune fo , qu ale l avo parcouru, j allo l arquerre pour l' donner à min père, et ENFIN, j' pouvo l avoir pour mi
mi, j'avo ker ch' jeu qui faiso l' journal chaque année ach' momint là, le fameux trucmuche, du qui fallo artrouver sur un dessin des objets trouvés pi résoude des enquêtes racontées dans des bandes dessinées ...
comme diro l aute , cha comminche à faire ...