souvenirs d' caleur

souvenirs d' caleurs à bruay, j' me souviens cor bin de 1976, mais meme avant quand que cha nous queyo su les zécalettes, in éto pas bin
faut dire , sans zete méquante langue, i a plus souvint connu des périotes d' draches que des périotes d' canicule ...

souvenirs d été, j éto cor tchiot , in devo aller am' mote à mon del tante à min père , rue Florent Evrard

pas loin del mason à vol d oiseau, mais au bras dem' mère , in a eu l impression d' traverser un pays desertique inconnu ...

autant en temps normal, té trouvo toudis un nartraité , ou queques mineurs hors poste , qui étotent arcourbés dins leu gardins ... ou en train d' discuter intre eusses ...

là... pas personne ....

té pouvo traverser ché corons sans croiser pratiqu'mint ame qui vive ....

tout l' monte éto infreumé , calfeutré à l intérieur d' chez masons...

et pas question d esperer apercevoir quéqu un dins l' pieche principale, ché portes à battant étotent bin freumées

pi que vous dire d' ché caniveaux du que l io d' vaisselle ou d' buée stagno à certains indrots , dégageant eune forte odeur ...

autant que d habitute ché corons cha nous paraisso accueillant, autant là, à vire tout freumé , cha donno l impression j allo dire presque d 'hostilité ...

enfin in arrivo rue louis dussart, in monto ché marches, Clara ale véno ouvrir, et là à l intérieur , eune fo que t éto dins' cuisine au fond , t éto sinon au frais, du moins chéto bin pu supportape

eune fo arrivés, Clara ale nous servo tout d' suite de l io, pi après ale sorto ché jus d' fruits

commincho ché commentaires su la caleur du genre " in a ker l' caleur mais là ch'est trop" ...
mi d' min coté j' buvo min Pam Pam ananas en ravisantdu coin d' l eule ché vieles photos dins ché cadres ...

au cours del conversation, Clara ale avouo que ch' matin ale avo djà fait un sacré périple ...
m' mère ale li dijo que ch'éto pas raisonnape, mais Clara ale avo toudis quéquosse à faire ...
des médicamints à renouveler, un tour au marché, un neveu à aller vire ....

en fait ale avo ker et' dehors par ché rues .....

après avoir arfait l' tour des gins qu in connaisso, que Clara ale avo raconté ché derniers potins, ah cha ale savo tout sur bruay ...

y éto l heure d arpartir, j allo écrire, j auro pu marquer y éto l heure d armonter, et d' la rue louis dussart, arprinte ch' ptit pont du 2 , et armonter chte fameux long coron d' la rue raymond deruy ...

t éto contint quand que t arrivo au coin d' la rue d isbergues , cha voulo dire que t avo fait ch' plus dur, et là bas au fond té voyo ché magasins d' la rue anatole france