fin d'drache, lachez les fauves 2
par minloute le, 25/08/2018cor heureux in avo ché pitits liffes de bandes dessinées qu in trouvo à pas ker , dins ché magasins d' journeaux ....
yavo souvint que la page d' couverture qu ale éto in couleur, à l intérieur chéto en noir et blanc
alors chéto soit des histoires d' chevaliers, d' pirates, de trappeurs , de western, ou de la seconte guerre mondiale
in en avo un certain nompe dins l' armoire, mais comme ch' temps i éto pas forchémint toudis au bio, in avo souvint l occasion d' les sortir, in fait , in les connaisso par coeur
in avo nos préférés , chéto les Ivanhoé, les Akim, les Rintintin et Rusty, pi les Tex Bill, Tex John.... sans oublier ché histoires d' la seconte guerre mondiale ....
ch' matin, comme diro m' mère "le temps i fait un mouvement", cha veut dire , et ché gins du nord i savent d' quo j' parle, ch'est l' momint, du que, ché nuaches comminchent à partir et à et' rimplaché par le solel ...
j a bin dit "comminché" , cha veut dire que pour que ch' temps i passe du mauvais au bio temps, fallo bin tro jours au moins dans l' meilleur des cas .......
bref, ch' matin i pleuvo pu, nous, ché grands tchiots , in l' faijo armarquer à ché parints
in l' faijo armarquer en insistant ...... in attindo ch' feu vert pour aller dins ché dunes ..
ma tante ale éto pas trop pour ... mon mononque y éto plus "large" ......
in y allo souvint , en ayant eu avant s' "bénédiction" , ma matante ale levo les épaules , du ginre, "ch'est pas raisonnape"
bon in avo juré qu in s' roulero pas such' sape vu qui éto tout fraique .........
alors mon mononque i ouvro l' porte et d un geste auguste i nous dijo "lachez les fauves .."
avec min cousin , in éto pas pas bêtes, in couro pas tout l' temps qu in pouvo et' vu del mason ....
j' diro même qu in in rajoutto, in s arrêto bin al' route, in raviso bin à gauche pi à droite avant d' traverser..... in forço même l' trait, savez un peu comme ché zacteurs des flimes muets ...
eune fo arrivés sul' coté du terrain de tennis, enfin j parle d' l ancien qui existe pu asteure, on emprunto un tchiot ch'min entre ché plantes à piquants, in avincho prudammint, pour arriver in haut del première dune ......
de là , on s artourno, et in cacho quequ' zinstants pour vire tout là bo la villa d' ma matante qui nous paraisso djà si loin ...
j' avo oublié d' vous dire, mais commint que j'a pu l oublier , qu in avo décidé avant d' partir à quo qu in allo juer
soit aux coboles et aux zindiens, soit à la seconte guerre mondiale
enfin mi j' em faijo pas d illusions, comme min cousin i éto plus agé qu'mi , i avo toudis l' beau rôle, si in juo aux coboles et aux indiens, ch'est mi qui faijo l' méchant , donc l indien .........
et quand qu in juo à 39 45 comme in dijo, min cousin chéto so l américain ou l inglais......... et mi à coup sur, un allemand, un japonais, l' plus pire, un italien .....
eune fo qu in avo passé l' sommet d' la dune, in s'savo asteure "tranquiles" , in pouvo pu et' vu....
là , in avo décidé d' juer à 39 45, vu les dernières arlectures qu in avo fait, in s' baso un peu sur l histoire d un des liffes qu in véno d ' lire
là j éto un allemand , j' devo aller m' camucher et aprés min cousin i cacho après mi
in avo des limites pour s' camucher, pas déchinte dins ché ronciers plus bas, pas aller plus loin quel ' mare à garnoules .......
i avo draché plusieurs jours, in éto ché premiers à marcher su ché dunes ...
quand qu'in avincho , not'pas i faijo craquer l' fine couche d' sape mouillé , cha faijo surtout qu in pouvo facil'mint suiffe quéqu un j' pourro dire "à la trace" .....
la promesse qu in avo fait, d' pas s' trainer dins l' sape, ch' éto impossipe à tenir ......
in plus, savez, quand que ch' sape i éto cor fraique, in in faijo des boules, j' voulo dire des grenates, qu in s'invoyo l'un sur l'aute d' par et d'aute d'un tchiot sommet ....
le temps i passe bin vite quand qu in jue, in avo quand même l'orele attentive à acouter si clocher i sonno l heure, c' qui voulo dire qu in devo arvenir ....
j' vous dis pas qu in éto toudis raccord , mais bon l'un dans l'aute , in arrivo souvint dans les temps
cor que , i nous avo fallu courir comme des dératés, ardéchinte avec précaution ch' passache du qui avo ché ronces ...
pi après in s' faijo le contrôle de la tenue, in s artiro l' trop plein d' sape ...
pas toudis facile à artirer tout ch' sape quand qui s' metto dins la laine d' ché pulls
après, in arprenno not' souffe, ouais, pasque arriver à l heure, en arrivant al' porte tout essoufflé, et ouvrer l' porte d intrée d'un coup, ch'éto pas trop apprécié ...
nan, fallo rintrer "gentimint" , pour que ché parints i s' dissent , "cha va i sont raisonnapes" ..
ah ché zéfants , que comédiens ...