in carette vers Merlimont 1
par minloute le, 10/09/2018min père quand qui parto in carette à Merlimont , chéto docteur jequile et mister ayde ....
autant i éto contint d y aller , autant i s' métamorphoso à l approche du départ, j' vous rappelle pas l' cérémonial du chargement d la 403..
avec la mise en place d' la galerie , pi des valisses, pi des tendeurs, et les jours du que le ciel éto "incertain" , un ciel normal quoi, i metto in plus eune bache
enfin i metto, j éto réquisitionné avec m' mère, pour passer chte bache
quand que j' parle d' bache, croyez pas que chéto in plastique comme ché baches d' gardin qu in acate asteure..
nan, am'mote cha devo et' eune bache qui avo du faire faire par sin camarate, que j a oublié sin nom, je m en escuse, un camarate qui travaillo aussi aux ateyiers centraux d' bruay et qui éto bourrelier
ah i li avo fait eune bache qu ale pouvo resister à toutes ché zintempéries, avec d'zattaches in cuir ..
comme diro l aute , ale avo les défauts d' ses qualités..... sur qu ale éto d eune solidité à toute épreuffe, mais d un poids que meme à trois in rigolo pas pour l' mette such' toit del carette
la mise in place d' la bache sul' carette, chéto un peu comme eune épreuffe d haltérophilie , un peu un "épaulé jetté" ...
fallo faire ch' mouv'mint ensempe, et bin sur, m' mère , ale éto toudis un peu en r'tard, ou ale avo pas la force, donc ch éto toudis d' sin coté que cha allo pas
min père i ralo toudis, là chéto sur qui allo en rajoutter eune couche ........
bon cha y est in y éto arrivés quand meme, pas meme un merci d' sa part, ou alors du bout des leffes, mais in se sauro pas avisé d' faire eune reflexion ....
nous in s' arplio vers la maison, m' mère ale resto quand meme à portée d oreles , vu que dans la mineute in allo intinte " Odette !", so i manquo quéquosse, so min père i s' dimindo si m'mère ale avo pas prévu d' am'ner à merlimont toute l' mason ........
bon, cha faijo un momint qu' min père i avo rin dit , m' mère et mi in éto pret à infiler nos loques et à l arjointe
ouais , pasque si min père i garo s' garette devant la maison, cha voulo dire qu in allo décoller dans les chinq mineutes qui allotent suive ...
mais fallo pas non pu et' trop prets, pasque cha l énervo aussi, pasque souvint i devo faire sin "pipi joli" , avant qu in s in ale
savez j a pris l avion pour le premier coup , j avo juste 40 ans , l' jur d' min niversaire, cha s invente te pas, mais j a pas été surpris ch' jur là , j auro pu meme et' directemint co pilote ..
bon , min père i avo battu ch' rappel , in parto, bin sur m' mère "ale traino" un peu, vu qu ale devo freumer l' mason, mette l' laisse à tchien , arfreumer la porte à clé, pi ch' portillon
eune fo tout l'monte installé dins l' peugeot break 403 de couleur grisse, commincho , escusez me pour l' terme inglais, commincho un checlisse
ouais le checlisse, ch'est c' qui font ch' pilote et ch'copilote des avions modernes avant d' décoller
in fait , i zarprennent eune liste d' détals et i ravissent si i sont raccords ...
dins l' carette, ch'est parel, sauf le contenu de la liste , sauf que mi j' l a connaisso par habitute , par coeur
alors chéto
t as bin freumé l' porte ? réponse oui Léonce, ouais min père i s' prénommo comme cha
t as pris ché cléfs d' merlimont ? m'mère ale ouvro sin sac et montro ch' trousseau
in a bin pris ch' transistor ? , ouais pasque Merlimont sans sin transistor chéto impensape pour min père
après i s' détindo et poso les deux dernieres questions destinées à adoucir l atmosphère un peu tindue ..
t as pris tin maillot d' bains ? . in fait as' plache, j l auro pas posé chte question, djà que m'mère ale avo pas ker aller à merlimont , alors aller à la plage, et incore plus envisager d' mette rin qu un dogt d' pied dins l io ....
et la derniere , me concernant
on a pas oublié minloute ? qui dijo min père en m' ravisant dans l' rétroviseur
allez , mes gins in route ....