j' l a ti vu ?

voyez,sérieus'mint, ch'est eune question que j' me pose d' temps en temps quand qu in arpart dins ché souvenirs d' ché corons

quand que j éto tchiot, j' me souviens que j éto plus turbulent quand que j éto qu avec m' mère, que quand que min père i éto là ...

faut dire qui avo des grantes mains, et j a l' souvenir d' mette un coup réfugié sous l' grante tape del salle à minger pour éviter eune clique que j allo quand meme arcevoir un peu plus tard eune fos que j auro été attrapé .....

comme i dijo " fouzi une bonne baffe" ......

alors quand que j éto tchiot et que j' deveno turbulent , m' mère ale dijo , "j' va t'donner à cachaloque quand qui va passer dins l'rue"

j' dos avouer que plus d un coup j a grimpé sul' cloture en béton qui séparo ch' gardin d' la rue, et d' là haut, j' raviso dins l' rue si j' voyo pas passer un attelage un peu bizare ...

j éto grimpé là haut en moins d' temps qui faut pour l écrire, vu que chéto ché clotures en béton toutes ajourées, que cha permetto à ché pieds d' s y incrinquer rapid'mint et d' monter aussi facil'mint que si chéto eune vraie échelle

alors, min souvenir , ou pététe un faux souvenir, le vlà, chéto à bruay, in armonto avec m' mère la rue de denain, cha devo dater autour de 1965, j a vu in haut del rue , quéqu un déchinte avec eune espece d' grand brancard ou d' grante brouette

j' peux pas vous in dire plus, j' sais ch'est étonnant , pourtant j' m arsouviens bin d'tout, sauf que ch' coup là, j a pas ravisé volontair'mint, vu que m' mère ale m avo dit que chéto cachaloque qui déchindo l' cote .....

j a pas ravisé, d' peur que j' so vindu à cachaloque .... mais j a un doute quand meme, j' sero plutot enclin à accroire que m'mère ale avo dit cha pour que j' reste calme, ou alors y auro cor eu des cachaloques au milieu des années 60 dins ché rues des corons ....

le mystère reste entier ...