hantise d'armonter

j' voudro pas vesquer ché gins qui y habitent cor, ch'est vraimint que cha m' tient à coeur

j'sus pu sur Bruay depuis un bon momint, et meme d' passache cha comminche à faire

j y suis cor à bruay, enfin du temps de Bruay que j a bin connu, d' la vingtaine d années entre 60 et un peu plus d' 80 que j y a vécu en permanence ou à la fin en intermittence

j' sais qu un jour , j y armonterai pour bin in faire ch' tour, mais pas pour l instant...

in est quand même d eune ville particulière, djà aprés la première guerre mondiale, et jusqu au début des années 60, chéto pas eune ville chéto eune fourmilière

odeur d' poussière d' carbon quand qui yavo du brouillard, trafic incessant , sirènes des usines et des dépôts à midi dans toute la ville, eune ville qui vivo par et pour ch' carbon , arpliée sur elle même , avec en son centre tous ché commerces ...

quand que té déchindo sur Bruay centre le samedi yavo du monte partout, au marché l' vendredi place marmottant chéto blindé, et que dire des différents quartiers qui vivotent presque arpliés sur eune même , avec tous leurs commerces de proximité ...

in déchindo au centre que pour ché chosses importantes, ché leunettes, la caisse d éparne, ché banques, la mairie, les assurances .......

j habito au 2 j auro été incapape d' vous dire quo qui yavo dans l'détal comme magasin rue Jules Guesde ou boulevard Basly ..

d ailleurs pourquo connaite, pasqu in avo pas vraimint d intérêt à y aller, in allo du coté du stade parc que si in allo chez Mayeur, Dessaux, et du coté du 3....pour aller au cimetière .......

in s' connaisso par rue , in connaisso grinmint d' gins du quartier, autour d'ses commerces et des' n école, Loubet pour nouzautes .....

ché corons.. yavo toudis quéqu un dins ché rues...so des infants qui y juotent, so ché viux accoudés au battant del porte, ou d' ché femmes qui passotent un dernier coup d' balai dins ché canivaux ...

alors j' vous a marqué tout c' qu in pouvo y vire, j' va pas arprinte tout c' que j a dis , et pourtant jel pourro, et vous dire commint que cha a évolué...tout a cangé ...

j' em dis d' temps en temps, que nouzautes ché "exilé" in peut énerver ceusses qui sont restés...

sur qu'in a et qu'in aura d' plus en plus d' maux d' s'y arconnaite

d'abord ché routes i cangent avec ch' nouviau bus, sans compter ché nombreux corons abattus

mais aussi pu s'y arconnaite avec les gins qui y habitent asteure

j' em dijo que si j arveno dins l' rue d' mes parints, j' cro qui ya pu qu'eune mason qui pourrotent cor s' souvenir d' mi et cor faudro que j' me présente .......

alors j' voudro pas finir sur eune note mélancolique, sur que tout a cangé , mais j' sais qu'un jur j y armonterai, j'y armonterai avec min garchon et ché pitits infants ...

oh cha va leur faire drôle vu qui viffent au solel du sute de l'Espagne , mais j' voudro vraimint leur montrer du que j'a habité et commint chéto Bruay, commint chéto eune ville industrielle...

et pi, j'do monter in haut dech' terril, in se l éto promis avec André, qu in allo y monter l' prochain coup que j allo armonter

entre temps, un premier avril, André i nous a fait l' plus mauvaise farce qu in pouvo faire

alors l' prochain coup, i s'ra avec nous, à monter tout in haut dech' terril