mauvais indiens
par minloute le, 12/10/2018toudis même indrot, la rue Leverrier, j' devro plutôt dire rue le verrier, vu que j a appris y a quequ' temps seul'mint que chéto li , urbain d' sin prénom, qui avo découvert la planète Neptune ..
bref présentation d' la rue Leverrier, eune rue in cul d' sac, 2 blocs d' masons à gauche , pi eune grante pâture, pi des garaches , et pi ché camps, avec vue sur ch' terril du 2 et la rue verte
à droite, 15 blocs de doubles masons, séparées intr' elles , et au bout bin sur, vue sur ch' terril du 2 et la rue verte ..
"am' n époque" , (ch' est vrai que cha comminche à faire), chéto djà tous que des zartraités
tout l' monte éto arrivé au plus tard début des années 50, ché zéfants asteure grands venotent ichi in carette, d' temps en temps vire leu parints
eune rue des plus tranquiles, pas grinmint d' circulation, vu que chéto en cul d' sac
pas d éfants d' min age, cor que j avo min camarate Joël qui habito rue Anatole France, d autes rue de Paris
in avo sympathisé avec des zéfants qui habitotent dins l' déchinte d' la rue Anatole France qui va vers les quat' chemins
i s éto connu dins l' grante pâture qui yavo, eune pâture qu ale devo faire bin 200m si c' n' est pas 300
ale existe pu asteure, vu que ch'est le lotiss'mint du qui a la rue des demoiselles qui s'a agrandi
là chéto not' territoire, in avo sympathisé avec ché zéfants là , pasque leurs gardins i donno such' te fameusse pâture
in appelo cha eune pâture, in devro plutot parler d'un champ qui éto pas cultivé
chéto plat sans relief, sauf au bout qui yavo eune toute tchiote butte, remplie d' ronciers et de tchiots zarpes, à l'accès pas aisé
et pi sul' coté, un grand cerisier qui faijo la joie des tchiots et qui nous filo la drisse au momint qu'in in mingeo plus que raisonablemint ...
un coup in juo tous sul' devant del pâture, et in vo, au bout, sortir d un gardin, un d' leu vigin , qui s'dirigeo vers che fameusse tchiote butte
savez comme tout bon indien qui vo quéqu un s'approcher d' sin territoire in s' méfio
surtout commint vous dire, in avo l impression que cht' t'homme là, i avincho d'eune facon pas "dégagée" , savez , in sinto que ch'éto pas clair quo qui allo faire ...
le consel des sages s'est réuni sur l instant, in a décidé d' observer c' qui faijo
ch' éto cor plus curieux, vu qui y a évité d' passer par ché ronciers, et qu en fait y a longé l' champ pour aller jusqu à ch' mur du bout
plus i avincho, plus i avo l air d' printe sin temps et d' bin raviser quo qui allo faire ..
et eune fos qui a été à coté dech' mur in brique, là du qui qui yavo un pan qui éto à terre, y a ravisé rapid'mint à l'intérieur , et bin plus vite que j' prinds l' temps d' l écrire, i éto djà d' l aute coté ...
là, y a même pont eu b'soin qu in discute longtimps, in a décidé d aller vire quo qui faijo
savez comme tout bon indien en chasse, l adrénaline ale a monté d un cran, et in a progressé entre ché zherpes, alternant course et camuchache .....
in a arrivé au coin d'ché ronciers le coeur battant, in s'a arrêté pour vire c'qui s' passo, et aussi pour attinde ché plus jones d intre nous ...
pas personne à l horizon, in s a mis en file indienne, curieux, mais aussi la peur au vinte, in tout cas pour ché plus jones qui avotent décidé, même à passer pour des poules mouillées, d' s’arrêter au coin des ronciers
le reste i avo continué, j' dis pas que tout l' monte éto as' n aise, mais savez en groupe , in ose pas toudis passer pour un froussard
in s approché, et in voyo toudis rin, in n' a un qui a ravisé par dessus l' mur du qui yéto au plus bas, yavo personne
cha nous a tous enhardi, et in a tous arlevé l' tiete pour vire à l intérieur, chéto en fait un grand verger
et d'un coup in a tous eu l' peur d' not' vie, vu que cht' homme qu in avo vu rintrer en douce, i éto camuché juste au pied dech' mur.....
i s'a arlévé et i nous a ingueulé du ginre "quo que vous faites là!"
savez in a pas d'mindé not' reste, cha a été la débandade, chacun pour tous, mais surtout chacun pour soi..
repli général, eune envolée d' moniaux ...
in s'a arrêté qu'eune fos arrivés au bout del pâture.... in avo j'té un coup d eule en arrière , in s éto aperçu qui éto arsorti aussi du verger , pas pour nous poursuive, mais pour artourner as' mason par sin gardin
in éto tous essoufflés, l' coeur qui batto la chamade, eune grante peur mêlée d un "drôle" d' sentimint
in s éto fait disputer par un adulte, alors que chéto li qui in fait faijo quéquosse d interdit .....
cha nous a coupé l' invie d' juer, in est rintrés à nos masons, et nos camarates qui habitotent juste à coté d' leur voisin indélicat, zont cor attindu un momint avant d' faire un détour dins l' pâture pour rintrer chez eux
par la suite, cha nous est arrivé d' l arvire ch' gars là; dins sin gardin, et i nous a jamais pu adressé la parole, mais in s'a quand même méfié d' li pendant un bon momint ...
je l'ai déjà dit j'cros ben mais el rue Leverrier cha me rappelle quand j'allo juer avec min copain Daniel Deruy qui habito al dernière maison à droite del rue tout au fond, sin père chéto Maurice Deruy el frère ed Raymond qui a donné sin nom al rue d'Anzin, sin pétit fils Philippe Deruy il est sur Facebook