ch'fourniau et chés pouchins

chés pouchins
Un aute avantache dé ch' fourniau, ch’éto d’élever des tiots pouchins au caud ; in les akato au marché d’Bruay du vendredi su l’plache marmottan ; pis aussitôt rintrés, in allo ker eun boite in carton din l’niche dé ch’l’escalier ; et d‘dins, in y méto dél paille fine et pis del ouate. Et pis in y méto délicatmint chés pouchins. Et in poso l’boite din ch’coin de l’cuisinière, such carrelage, au caud. In leur donno du lait pis ch’sais pu quoi à minger. Chés p’tites bêtes, y piaillotent à qui mieux mieux.

Avant d’aller s’coucher, in allot les raviser pis leur dire au r’voir. Et quand in s’lévot au matin, in allot les vir dins l’boite, avant même d’aller picher dins l’water au fond dél cour.
Pis après, y devenotent trop grands, et y courotent tout partout dins l’cuisine. Y faijotent des étrons tout partout et m’mère al passot sin temps à laver ch’carrelage. Alors min père les mettot din ch’poulailler avec les autes poules et pis surtout ch’coq qu’étot méchant. Alors pour les mette à l’abri, in fésot eune séparation avec des planques din ch’poulailler ; et y restotent là d’dins jusqu’à temps qu’y seuchent assez grands pour pouvoir s’défindre tout seuls.

Pour avoir des pouchins, y’ avot eune aut’ solution : ch’étot d’akater des œufs avec des germes à l’marchande éd’ fromage. Al passot eun fo par semaine dins l’rue avec és’ camionette in klaxonant et in allot akater du beurre et pis des œufs quand in n’avo pas assez ; pas de fromach, ch’étot trop ker. Et des fos, lorsque min père y’avo armarqué qu’eune poule dins ch’poulailler alle s’mettot à couver , in akatot des œufs avec des germes à l’marchande ed’fromach. Pour savoir si y’avot des germes, all métot chés œufs in d’sous d’eune lampe à ultra violets (j’cros bien) din l’fond dé s’camionette.

In in prenot 4 ou 6 et pis in allot les mett’ in d’sous dé l’poule qui comminchot à couver. Et tous les jours in allot vir din ch’poulailler si chés pouchins y étotes v’nus au monde. Et pis un biau matin, in arrivant à ch’grillage in intindot piuler : chés pouchins y étotes là ! Alors après soit in les léchot avec él’poule din ch’poulailler in mettant des planques tout autour déch’nid pour pas qu’ché cocqs (ou même chés poules, y n’avot des méchantes !) y leur donnent des coups d’bec. Et si y féjot trop fro, in les mettot dins l’cuisine dins eune boite in carton tout près dé ch’fu.

Si l’poule al resto dins ch’pouliller avec ses pouchins, alle étot traitée comme un coq in pâte ! In li donnot à minger in premier, les meilleures épluchures ; in li féjot des caresses pis aussi à ses pouchins. Dins l’tas, y n’avot toudis un qu’y étot pas comme les aut’s et y devenot ch’chouchou. In l’prenot dins l’maison et il avot l’drot d’courir tout partout. Ch’ti là, il avo souvint un destin à part dés z’autes : min père y’avo pas l’drot dé l’tuer pour l’minger l’diminche. In veillot au grain ! Et pis un jour, y disparaichot quand minme ….