Arras ici Arras
par minloute le, 26/11/2018quand que j armonto en train depuis Paris, ch'voyache pour mi i commincho vraimint quand qu in arrivo avant Arras, quand qu in véyo ché premiers cimetieres militaires ...
queques tombes regroupées autour d un tchiot monumint, premiers signes d' la bataille d Artois qui s éto livrée par chi au début de la premiere guerre mondiale ...
croyez pas qu in arrivant à Arras, j' em pinso chez nous ....
nan, ch'train i s arréto un bon momint ichi, pasqui allo s'séparer in deux , le début du train i parto vers Lille, tandis qu' nouzautes i fallo qu in attinte l arrivée , j allo dire d' la locomotive , qui allo s accrocher en tete d' ligne
par la vitre, j' raviso ché dernieres personnes déchintent, quequ' fos yavo meme des gins qui s étotent avinché pour les accueillir, et leur printe leu valisse qui péso l' poids d un ane mort .......
Arras, triste ville, à l époque aussi étrangère qu eune aute ville de province .....
ichi in n' est pas dins ch' bassin minier, ché masons sont bin en briques rouges, mais j allo dire sans style .....
à s' deminder d' quo cha pouvo vive eune vile parele , sans mines à coté .....
cha comminche à armonter dins ché wagons.......
là chéto comme eune bouffée d air fraique, chéto des gins d' part chez nous qui montontent ...
cha parlo patois, t intindo ché parints appeler ché zinfants qui portotent tous des prénoms des feuilletons américains...
t avo des Dylan, des Cassandra...
Pi des Océane et des Angelique ....
cha parlo fort , quand qui s instalotent, j' dis cha sans aucune moquerie, ché ché gins d' par chez nous, sans chichis, sans froufrous, nan , des gins authentiques
sur ch' quai , ya ch' chef d' quai qui passe duch'mint , i ravisse si tout va bin, et que ya pu personne qui devro monter ..
avec sin vinte qui dépasso bin d' sin costume, tout l' monte i pinso la meme chosse, et i n avo bin in qui dijo assez fort, "bin chtilale i minche bin al' cantine" , cha chéto quand que chéto gentil ..
quequ'fo t avo dro à "i do pas trop saquer d'dins chtilale, cor un fonctionnaire"
mi j attinds simplemint qui donne ch' coup d' sifflet du départ
cha y est ch' train i quitte tout duch'mint la gare...
pas gais ché à coté....
des herpes qui poussent au pied d' ché rals, des tags tout partout, sur ché murs d' palissates en béton ...
ciel bas, cor un peu d' brume, mais ch'est pas cha qui va juer sur min moral ..
cha sero plutot l' contraire, in quitto Arras pour aller vers ch' bassin minier ..
in approche d' Farbus, on longe sur la droite la colline boisée de Vimy
in passe devant ché toutes tchiotes gares, un batimint perdu au miyeu des camps ou ach' bout d un tchiot villache
mais tout cha j'el ravisse à peine, j' vo surtout qu in est arrivé (enfin) dans la grante plaine ...
ichi tout est plat, avec d' par chi par là , comme d immenses taupinieres, ché premiers terrils , avec tout autour ché masons en briques rouches, agglutinées ...
cha y est in va vraimint i rintrer dins ch' bassin
in arriffe à Avion...
à partir d' là , sur un court tronçon, va y avoir grinmint d' montées et d' déchintes d' ché wagons ...
Avion, pi la grante halte de Lens ........
là, in éto entouré par ché corons, i n avo différentes sortes, ceusses dont les masons étotent accollées, d autes, argroupées par deux avec un gardin autour ...
in voyo aussi ché clochers des églisses, et ch' fameux chevalet qui dépassotent des toits rouges .......
là j' do vous dire qu eune fo passé Lens, j éto cor plus contint, j' savo que j allo bientot arriver à Béthune ...
in éto arparti, in passo devant des toutes tchiotes gares
Bully Grenay, Sains en Gohelle, pi Noeux les mines dont in passo pas loin d' ché terrils ...
après , commint vous dire, meme si j allo à Bruay, de Noeux les mines à Béthune, j avo djà l impression qu in quitto ch' bassin ...
yavo pu d' terrils, yavo bin des agglomérations mais chéto pu des corons ...
l' temps d écrire tout cha in arrivo à Béthune ..
eune fo arrivé, fallo presque courrir pour printe ch' bus pour Bruay, fallo pas trainer sinan t avo dro à attinte eune demie heure
vous m' direz eune demie heure ch'est pas si long qu' cha ...