Les jardinsLe « lait concentré sucré Mont Blanc »
par berlens78 le, 03/12/2018Quand qu’y avot pu d’lait, ém mère alle allot quère él boite ed « lait concentré mont blanc » ; alle faijot un tro d’un coté avec ech l’ouffre boite , et pis un autre in face such couverque pour que ch’précieux liquide y sorte; pis alle nous in versot un tiot peu dins not cuillère à chuque pour qu’in l’arverse après dins ch’lait; el double opération là, cha permettot d’chucher l’cuiller pour léquer ch’ qui restot d’sus.
Souvint m’mère alle ringeot l’boite après mais chétot tellemint bon que dès qu’alle avot sin dos tourné, in allot arquère élle boite et in plongeot l’cuiller dinch pot pour el chucher direct à l’cuiller ; pi in arcomminchot, in pouvot pas s’in impécher, chétot ptête déjà à l’époque eune «addiction» (ch’mot là y existot pas cor’); pi in s’arretot passe que ch’niveau din ch’pot y avot gramint diminué.
Alors in finichot sin bol éd café au lait in espérant qu’y n’auro cor un tiot peu dins ch’ fond
Et pis des fos quand minme, ém’mère alle s’in rindot compte que ch’pot y’avo fait qu’eune vision alors alle nous ravisot avec suspichion. Nous, tranquilles comme batisse, in restot l’bouque collée dins not bol avec seulemint nous yiux qui dépassotent déch bord et in faijot les innochints.
Pus tard, chétot pus des boites mais des tubes ; y n’avot moins d’dins. Mais in n’avot pus besoin d’cuiller, in l’chuchot direct à ch’tube !
(photo)
