cor un qui va passer à la trappe ....
par minloute le, 06/12/2018début du mo d' décempe , chéto un avant gout de la Noël ...
min père travaillo "au jour" et i féto la Saint Eloi, j in a djà parlé , la Saint Eloi ch'est lié au plaiji d archevoir d' la part d' min père au retour d eune fête à son traval, d un paquet de chinq crayons d' couleur .........
j avo été tel' mint contint et plus d' 50 ans après, j in a cor le souvenir et la sensation d' bonheur en les arcevant ....
la Saint Eloi passée, arrivo la Saint Nicolas, alors là la Saint Nicolas chéto pas l' même fête de la Noël , ch'est sur, mais ale avo del magie ......
la magie d archevoir des cartes postales .... j' les attindo d' pied ferme, j espéro in avoir grinmint
j' commincho à guetter ch' facteur djà deux jurs avant, enfin j' faijo cha que j' croyo faire discret'mint
comme auro dit min père, "d un regard un p'tit peu dédaigneusse" ...... mais en ravisant quand même
quand que cha arrivo, alors que j éto contint, c' que j' faijo ch'est que j' les metto eune après l aute, à la queue leu leu , d'vant ch' buffet ...
plus in recevo plus in éto contint, ch' est sur que ch éto eune question d égocentrisme dirotent certains , j su pas loin d' pinser parel ........
à la Saint Nicolas, in avo souvint un tchiot nounours en chocolat, un tchiot cadeau, comme en cas avant la Noël in pourro dire ..........
j' les avo ker ché cartes postales, surtout ch' ruban jaune d' collé au coin
mais tout cha aussi ch'est en train de disparaite , cha va s' rallonger à la longue liste des mardi gras, mi carême, pichon d avril, sainte Catherine et asteure saint Nicolas ...
tout cha pour met' in valeur alouine, pour ché tchiots et la saint Valentin pour ché grands
cha génére plus d argent ch'est sur ...
( 1 photos)