Le catéchisme avec l’abbé Grard rue de Ranchicourt

Dins ch’temps là, chés instituteurs et pis chez curés y féjotent pas bon ménache. In devot faire és’ première communion, et pour cha in devot aller au caté.
A ch’t’époque là, 62 ou 63, ch’étot cor ch’curé qui féjot l’caté ; in tous cas, dins min quartier du 4.

Le caté, ch’étot eune fos par seminne, jé n’sais pus que jour, él jeudi peutète. Ch’étot avant l’école et y fallot s’rassaquer d’bonne heure ; j’cros ben que cha comminchot à 7H.
J’abito in haut dél rue d’divion et l’salle éd caté, allé étot rue de Ranchicourt, dins eune baraque in bos à coté d’chés garaches du qu’elle tiote Brigitte alle a été assassinée quéque zannées pus tard. In l’appélot ch’baraquement ; y a dû ête démoli après pour faire des garages y m’semne.

Quand j’arrivot avec mes camarates dé l’rue d’ Divion, souvint ch’étot cor l’hiver et y féjot frod ; ch’étot Monsieur l’abbé Grard qui féjot l’caté.
Avant d’commincher, in l’aidot à allumer ch’poèle à carbon ; in gardot nos mouffes pis note cagoule in attindant qué ch’fu y s’mette à cauffer. Quand qu’in parlot, y avot dé l’finquère blanque qui sortot d’nos bouques et chés f’nêtes y zétotes arcouvertes éd ‘giffe.

In avot un cahier d’caté qu’in apportot dins note carnasse ; éd’sus, in arcopiot des prières, in féjot des dessins d’la sainte vierge. In lijot des évangiles éd’ saint Paul ou saint Mathieu ; in avot des devoirs aussi et des fos ch’curé y nous interrogeot comme à l’école.

L’abbé Grard y étot trop gintil et des fos in in profitot pour faire él sinche. Jé m’rappelle qu’eune fos, in courot sur chés tappes et in l’lavot tellemint énervé qu’y m’avot foutu eune claque ! Après cha, y étot vraimint imbété et y étot v’nu à m’maison pour él’dire à mes parints pis s’escuser.
Ch’étot pas eune bonne idée passe qu’in rintrant d’l’école au soir, jé n’avos archu eune aute éd’ l’aute coté par ém’mère et pis aussi eune belle punichion.

L’abbé Grard jé n’y in avot pas voulu passe que ché vrai qu’in avot vraimint exagéré. Pour preuffe, quand qu’ jé m’sus marié à l’église St Martin in 1980, presqu’eune vingtaine d’années pus tard, ché li qu’j’avos cuji pour officier l’cérémonie.

L’abbé Grard, y’étot devenu par la suite un prête ouvrier ; y féjot intre autes él garchon boucher àmont Lossignol ; pis cor d’autes métiers ; y voulot partager les souffrinches dé ch’pétit peupe. L’abbé Grard ch’étot un saint.

Pour én’ arvenir à ch’caté, ch’curé y nous laichot partir 10 minutes avant pour aller à l’école ; jé m’rappelle qu’in courot comme des dératés pour arriver avant qu’él’ grille alle ferme. In passot dins chés camps au bout dé l’rue d’Ranchicourt et in s’artrouvot jé n’sais pu commint in bas dél rue des Alpes pis l’rue du Jura pis l’école Pasteur.

Si in arrivot in artard, in étot punis par éch maite ; et y fallot pas dire que ch’étot à cause du caté passe qu’élle punichion alle étot doublée. In savot bien qu’in n’avot pas fait maux mais in avot compris dins not tiote cervelle éd’moniau qu’chés deux mondes là y pouvotent pas s’vire.

(Voir les 3 photos de mon cahier de caté de 1962 ou 63 et de l’abbé Grard le 19 avril 1980)