l' aprés midi dins ché commerces

in a mingé, ch' café y a été bu,la vaisselle ale est faite

souvint , là ché femmes ale se prenotent eune heure pour s' rapurer, pi veno l aprés midi

l aprés midi chéto souvint l' momint pour faire ché courses espéciales

ch'est ché courses qu in a besoin d' faire mais qu in aura pas eu l' temps d' faire au matin vu qui faut préparer ch' frichti...

mais souvint chéto des courses du qui fallo busier ou tout du moins printe son temps ...

pasque chéto pu l' ménagère qui éto concernée mais j allo dire un gros mot " la femme d interieur" , tout au moins l'femme qu ale voulo arringer s' mason ou sa maisonnée

direction la mercerie, pour racater eune braguette qu ale éto cassée , j' me souviens d' Louisse Defernez qui, eune fos qu ale savo la longueur d' braguette qu in voulo, allo décrocher tout un paquet qui éto suspendu dins zin coin

ale in vérifio vite fait la longueur in les étalant su sin comptoir en bo, du qui éto fixé un mete étalon , in bo aussi

mi tout tchiot , j éto impressionné par Louisse, maitresse femme du magasin, seul pilier d ailleurs pasque fallo pas trop compter sur Léonie s' soeur, qui commincho toudis par " j' sais pas si j'en' n ai cor" quand qu in demindo quequosse

d ailleurs j' la soupçonno d' pas trop cacher, un coup s' soeur Louisse ale éto arrivée et ale l avo ingueulée pasque c' qu in demindo chéto sur qui y en avo .....

et cor moins sur sin frère Léon, qui éto très gentil, dans tous les sens du terme, toudis relegué au fond du long couloir du magasin quand qui éto pas à arfaire ché matelas qu in li avo confiés .....

choix d' eune braguette, de "fil au chinois" aussi, d ailleurs rin qu à vire la tiete de profil du chinois qui yavo d' chaque coté del bobine, cha devo et' du sérieux vu qui rigolo jamais ........

plus loin yavo la droguerie tenue par Madame Cadot, là dés que t ouvro l' porte chéto un mélanche d odeurs bin agréapes.......

cires, produits décapants, antimites, cha faijo un coquetele bin agréape à sintir , eune "fragrance " si in prind ché mots du diminche ......

chéto un vrai labyrinthe, fallo faire attention du que té metto ché pieds ...et tes bras ...

ichi à gauche des balais accrochés, par là toutes sortes d' lessiffes , à gauche l étagère à boites à ciraches pour ché godasses , à droite les boites et ché bidons pour nettoyer ché fourneaux ...

ah j avo ker le dessus d' la boite à cirache de marque Kiwi, chéto d un exotisme au miyeu des années 60 et d un aut' coté ch' bidon d' zébraline .....

ah que j ' l avo ker ch' bidon là, i n avo d' 2 sortes, chéto des bidons du que té voyo un zébre au miyeu et d' chaque coté chéto strié , so en vert so en rouche

m' mère ale acato le bidon rouche, et souv'nez vous d' l odeur que cha avo quand qu in in metto such' fourneau cor caud, cha permetto del nettoyer, tout en dégageant eune odeur bin particuliere ...

sul' coté des rangées d' pots d' peinture, fallo passer entre ch' présentoir à paillassons pi l étagère du qui yavo les attrapes souris, et enfin en slalomant un tchiot peu in arrivo devant ch' fameux présentoir à toile cirée

ah que plaiji pour l' femme d ' canger sa toile cirée, ah chéto pas grand cosse, mais pour elle chéto important, avoir toudis eune belle toile cirée, chéto aussi important que pour ch' mineur d avoir toudis un bio gardin ...

j' me souviens qu in in avo avec des tietes d' bidets d' courses , eune aute plus classique avec des carreaux vichy, sans oublier eune aute avec des grantes marguerites d' sur.....

in arsorto du magasin, in allo plus loin à la framacie, chez Bonnet ou Bonnier j' su pu sur du nom, là fallo monter eune paire d' marches pour acceder au magasin

in avo l impression d' monter l everest pour y acceder à la framacie

j' m éto fais la reflexion, que chéto bin dangereux pour y acceder, surtout que ché gins qui y montotent i devotent tous et' malate

in plus la porte vitrée ale éto dure à ouvrir, eune fos d' dins t éto aussi pris par l' odeur qui s in dégageo

autant à la droguerie chéto un mélanche d odeurs d' produits ménagers, autant à la framacie.... si in devo résumer , cha sinto l' suppositoire ...

là bo t éto servi so par Roland, l employé, un grand monsieur avec un bouc, d eune grante gentillesse malgré sa voie grave et le fait qui marcho un peu comme un compas

i avo eune gampe raite de travers, mais meme infant i nous faijo pas peur

sinan t avo ch' framacien, tout en rondeur et en rougeur avec ses quequ' caveux blonds qui lui restotent , comme dijo min père quand que m' mère ale dijo qu ale allo al' framacie " té va vire ch' bébé cadum" ........

in parlo tout duch'mint dans la framacie, meme ché commères ale la mettotent in veilleusse, d' abord si voulez savoir quo qu ale a comme maladie celle qui est d' vant vous, faut pouvoir tende l orele .....

pi quand ch'est sin tour, ale veut pas non pu qu eune aut' commère qui est derriere elle ale sache quo qu ale a ...

in plus savez,dans la mentalité des gins, ch' framacien, meme si chéto pas un docteur, i devo savoir, la preuffe aussi, i porto toudis eune blouse blanque ......

cha y est in arsort, en faijo attention d' pas querre dins ché marches, et in allo cor plus bas

in passo devant la cité des électriciens, un souvenir d y et' passé un aprés midi et qui faijo bin caud, cha sinto fort dins ché ruaux ........

in déchindant le tout début d' la rue anatole france, avant quand meme les grands bureaux

pour ceusses qui étotent du coin, avant la station essence bondues, avant un magasin j' cro que chéto les arcades , à confirmer...

yavo un magasin qui vindo des graines pour ché gardins...et des graines pour ché zoziaux

graines pour ché coulons, nous in y allo pour ché graines à pérruches

sans compter qui yavo des sacs d' tourbe et d' terreaux pour ché jardiniers

que bonne odeur, d ailleurs im' suffit d aller dins zin magasin espécialisé pour ché gardins pour faire un bon en arriere en sintant les memes odeurs ....

de là on arveno al' mason, quequ' fo in s arreto devant chez Nen, ch'éto un magasin qui vindo entre aut' des fruits , et souvint m' mere ale acato des zoranches là quand que chéto la saison ...

yavo pas grand monte su ché trottoirs quand qu in arveno al' mason...
de ch' fait là , cha paraisso presque interminape pour arvenir au coin d' la rue leverrier

coté senteur, in avo dro aussi à la bonne odeur , savez celle qui s' dégageo du café vanvimeersh quand quéqu un ouvro l' porte, mélanche d' finquées d' cigarettes et d' biere...
ma mère ale presso l' pas quand qu in passo d' vant, chéto comme si chéto pour elle , un lieu d' perdition, avec des gens pas fréquantapes ..

in arrivo presque al' mason qui a des coups in intindo l' sonette d' la porte dech coiffeur à mon Noel qui s ouvro, d' là , in avo dro à eune forte odeur d' laques , d' produits pour ché misemplis.....

grinmint d' chimique tout cha ........

nous vlà de retour à la mason , in déchindra plus tard faire d autes courses dans l' centre d' bruay ...